Desakato déxenlo y anuncien xira de despidida

Esti miércoles 16 de payares Desakato anunciaron nun comunicáu a traviés d’Instagram que dexen la so actividá. Con esti anunciu despídese una de les bandes más importantes del rock d’Asturies y tamién del Estáu español; sicasí, anuncien a la par les primeres feches d’una xira despidida que van facer en tol 2023 y que va rematar el 11 de payares de nel Wizink Center de Madrid, ente miles de persones. Desakato ye un grupu qu’a lo llargo de cuasi dos décades de camín amosó’l so compromisu cola llingua asturiana, visibilizando la realidá llingüística del país nos milenta conciertos que dieron ente aforos siempre enllenos de xente. D’esta miente, musicasturiana.com queremos rendi-yos homenaxe y agradece-yos el so llabor compilando tolos cantares qu’asoleyaron n’asturianu nuna playlist: Desakato: n’asturianu.

Esti ye’l comunicáu íntegru que publicó’l grupu de Llanera nes sos redes sociales:

Esta ye la decisión más difícil que garramos a lo llargo’l nuestru camín. Sabemos que munchos de vosotros y vosotres nun vais entender por qué facemos esto, pero creemos que ye lo que tenemos que facer. Desakato despidímonos como banda.

Dexámonos siempre’l pelleyu nesto y concebimos el nuestru grupu con muncha intensidá en toles estayes. El nivel d’enerxía física y emocional que tien tocar nuna banda como la nuestra, fai que desixéramos siempre tar na llende de les nuestres posibilidaes y esa exisencia desgastónos.

Queremos da-y les agracies a la nuestra familia, a tolos siguidores, y al nuestru equipu que tamién ye la nuestra familia, por acompañanos toos estos años y por ayudanos a crecer y a deprender a disfrutar d’esti camín. Sentímonos unos privilexaos y superamos enforma tolo que suañáramos.

Nun sabríemos asimilar la decadencia de la nuestra enerxía y tamos convencíos de qu’una despidida d’altor ye la meyor forma de festexar lo qu’algamamos. Tovía vémonos con fuercies pa dexar a esta banda nel llugar que se merez. Quédanos un añu y vamos a vivilu intensamente.

Dexa un comentariu

X