La Tarrancha da esti sábadu en L.lena’l so conciertu “Camín del venti”, con una montonera collaboraciones
La banda de fusión La Tarrancha zarra esti sábadu 19 de payares la xira del 2022 con un conciertu mui especial. Coincidiendo con que nel 2023 cúmplense 20 años del nacimientu del grupu , van dar una actuación col nome “Camín del Venti” na que van collaborar más de diez músicos. Va ser nel Teatru Vital Aza de La Pola (L.lena), a les 19h y de baldre.. «De mano, paez un llugar un poco raru pa un conciertu d’una banda qu’anima a baillar, pero en realidá, ye’l llugar afayaízu pa una gala llena de collaboraciones y de calor fraternal», comenten dende’l grupu.
“Camín del Venti”, nun fai referencia namás a los venti años, sinon también al nome de la xira que va facer la banda nel 2023, que nun va ser otru que “Venti”. El conciertu va grabase, de mano, pa tener constancia del momentu, anque nun se descarta asoleyar de dalguna forma’l material, yá seya peles redes o en formatu físicu. «Venti años dan pa muncho y pa poco. Hebo mil anécdotes, kilómetros de carretera, penes, allegríes, seis discos, compilatorios con canciones especifiques pa ellos, cenciellos… y sobre too munches amigues y amigos nel camín», comenta Delfín Valdés, vocalista del grupu. Por eso pal conciertu Camín del Venti van cuntar «con una parte de la familia de músicos tarrancheros».
Les collaboraciones confirmaes son les de Nano, guitarrista excomponente y fundaor de la banda, conocíu por formar parte de grandes bandes punk de los 90-; Simón San José, percusionista y luthier que también foi batería de La Tarrancha-; Paco Calero, actualmente en Gemtonics y Bindy Bazaar. que ye un ye un tarranchasuplente, nel so casu al baxu; Dani Valdés, batería actual de La Mueska y como suplente en La Tarrancha; Dani Álvarez. Conocíu multiiinstrumentista nel mundu folk y habitual collaboraor de La Tarrancha a les flautes, buzuki y gaita; Nel de Purnea, baxista y guitarrista que forma parte de Vrienden o pasó per bandes como Muñeco Vudu, tamién foi baxista suplente un tiempu en La Tarrancha; y gaiteros y percusionistes de la Banda Gaites Villaviciosa, que yá collaboraron con La Tarrancha tanto n’estudiu como en directo. Amás los mandos del soniu y la grabación del conciertu va tar en manes de los dos técnicos actuales del grupu: el productor Zeros, y el cantante Ruboh, qu’amás de facer el soníu va xubir al escenariu pa cantar una.
«A La Tarrancha diba presta-y muncho poder ver ente nes butaques, xente d’otros grupos colos que compartieron tantes coses y públicu de toles edaes y etapes de la banda. Y como non, a les de siempre», conclúi el grupu sobre esti conciertu que ta dientro del circuitu cultural Asturies Cultura En Rede, cola collaboración de la Conceyalía de Cultura de L.lena y el sofitu de musicasturiana.com.
