La Conseyería d’Educación y la de Cultura convoquen el I Certame escolar de Cantares d’Iviernu y Avientu

Les conseyeríes d’Educación y de Cultura, Política Llingüística y Turismu convoquen per primer vez el Certame de Cantares d’Iviernu y Avientu / Certame de Cántigas d’Inverno. Esti concursu formúlase como un proyectu abiertu a toles árees y situaciones d’aprendimientu y tien la modalidá d’interpretación pa coros escolares en dos categoríes: Primaria y Secundaria/Bachilleratu. El plazu pa presentase remata’l 2 d’avientu a les 20h y nes bases publicaes pol gobiernu pue vese tola información.

Nesti certame les característiques de los coros y de les interpretaciones son les siguientes: Cada coru va tener un docente responsable. Los coros pueden ser internivel y tar formaos por cuantes voces s’estime respetando les dos categoríes esistentes de Primaria y Secundaria/Bachilleratu; cada centru educativu puede presentar hasta 2 cantares n’asturianu o en gallego-asturianu per categoría; entiéndese por cantar d’iviernu o d’avientu cualesquier canción tradicional, popular o festiva que se cante n’iviernu o per navidá; los coros van poder acompañar la interpretación con instrumentos musicales de pequeña percusión tocaos pol alumnáu tales como panderetes, triángulos, campanines, castañueles, etc. y/o un instrumentu como máximo (gaita, curdión, vigulín…) que pue tar tocáu tanto pol alumnáu como por un/a docente. Per último, la duración máxima del cantar ye de 8 minutos y éstos tienen de ser grabaos en formatu de videu estándar pa la so valoración posterior.

Con esti certame, música, llingua asturiana y educación vuelven a dir de la mano nesti añu 2022, dempués de que va unes meses la Rede de Normalización Llingüística, la Conseyería de Cultura, Política Llingüística y Turismu y la Conseyería d’Educación collaboraren nel programa interdesciplinar Al Son del Cantar, que culminó cola edición d’un discu del mesmu nome.

Mercar discos de música pa la reciella na tienda online