La música asturiana ye un arma cargada de solidaridá y un antídotu contra l’odiu y el facismu. Asina ye como esti sábadu n’Uviéu va volver amosar el so compromisu coles causes sociales y tomar l’espaciu públicu pa ello. Tres de l’agresión facista que sufrieron los dos activistes d’AMA Asturies, Rubén Rosón y Jorge Fernández, la selmana pasada na caseta de Fiestes Populares de San Mateo; la respuesta va volver a desbordar la Plaza la Catedral d’Uviéu na movilización Somos Más, na que va haber una concentración y un conciertu de música’l país.
La mítica banda de rock astur Dixebra, el dúu de música tradicional Ambás ya Ramsés, la cantautora Marisa Valle Roso y una «actuación sorpresa» van poner son al actu esti sábadu a les 20.30h, hora y media dempués de qu’arranque la concentración. Ye una doble respuesta a les acciones de la derecha más reaccionaria: primero, porque va amosar el rechazu de la sociedá asturiana a los ataques d’odiu; segundu, porque ye una reivindicación del modelu vieyu del San Mateo popular, nel qu’había conciertos gratuitos destacaos na Plaza la Catedral.
«Somos más la xente que quier una Asturies llibre, diversa y ensin naide decidiendo a palos quién puede tar y quién non. Quién puede mirase y quién non. Somos más la xente que quier drechos, igualdá y una democracia onde quepa tol mundu. Esti sábadu toca demostralo como meyor sabemos. Axuntándonos, faciendo cultura y dando vida a la plaza y a la folixa», manifiesten dende AMA Asturies na convocatoria de lo que se preveé como una movilización masiva.
Suscríbite a les nuestres novedaes
