Del 10 al 12 d’abril La Felguera acueye una edición nueva del Festival Internacional de la Cerveza Artesano d’Asturies, eventu qu’axunta puestos de cerveza, foodtrucks y conciertos. La música del país ta presente tolos años nesti certame y nesta edición la organización yá anunció que, ente les quince actuaciones musicales que va haber -cinco d’elles yá tán confirmaos-, una va ser la de Dixebra, mítica banda del rock astur. Tamién va haber una sesión de DJ La Güeriata, pinchadiscos que fai una esbilla musical na que siempre hai espaciu pa la música asturiana electrónica, tradi-fusión y punk-rock.
Los Xardinos de la Pinacoteca Eduardo Urculo van ser l’espaciu nel que se desenvuelva esti festival d’entrada llibre pal qu’esti añu va haber delles novedaes, como anunció la productora A Mansalva, organizadora del eventu xunto a Llangréu Cultural y l’Ayuntamientu de Llangréu. Una «quedada trailcervecera» p’aficionaos y aficionaes, la grabación del podcast Birra en Ruta y el Pozu Creativu -«un espaciu abiertu a toles disciplines artístiques: ilustración, pintura, escultura, fotografía, cerámica, moda, bisutería, figurines, y más»- son les incorporaciones nueves a la programación d’un certame que va axuntar un total de doce cerveceres d’Asturies, l’Estáu español y Europa.
Amás del conciertu n’asturianu de Dixebra y de la sesión de DJ La Güeriata, yá tán confirmaes les actuaciones grupos d’Asturies Indocentes y Muñeca Rusa, amás de Leo Jiménez, ún de los artistes más destacaos de la escena metal estatal. Nos próximos díes la organización va dir dando anuncia de más conciertos.
Suscríbite a les nuestres novedaes
