Dos destacaes cites pa la escena rockera n’Asturies, el Festival Internacional de la Cerveza Artesano d’Asturies y el Maízu Rock, anunciaron va unos díes la programación completa de les sos ediciones d’esti añu. Nel eventu llangreanu que se celebra del 10 al 12 d’abril en La Felguera van actuar el vienres 10 les formaciones de rock n’asturianu Dixebra (23.30h) y Ochobre (01.30h), amás de DJ La Güeriata (03h), que tamién va pinchar el sábadu 11 a la mesma otra. Per otru llau, nel festival d’Intriago (Cangues d’Onís) que va tener llugar los díes 3 y 4 de xunetu toquen Ochobre y Mala Reputación.
Los Xardinos de la Pinacoteca Eduardo Urculo van ser l’espaciu nel que se desenvuelva una edición nueva del Festival Internacional de la Cerveza Artesano d’Asturies, eventu qu’axunta puestos de cerveza, foodtrucks y conciertos. Van participar un total de doce cerveceres d’Asturies, l’Estáu español y Europa y tamién actúen otres formaciones de dientro y fuera del país: Bala, Leo Jiménez, Muñeca Rusa, Triple Malta, Gemtonics, Mckalisters, Ribanos, Indocentes, Sacavera, Midnite Sailors y Los Juanes.
La llocalidá d’Intriago (Cangues d’Onís) va acoyer la XII edición del Maizu Rock, un eventu gratuitu y ensin animu llucrativu que siempre apuesta por programar bandes rock, punk o metal n’asturianu. Amás del grupu rock astur Ochobre y de Mala Reputación -que tienen dellos temes n’asturianu-, esti añu tamién actúen No Konforme, Rienda Suelta, Maverick, Ritmo Vudú, Deklibe y les formaciones que compiten nel concursu de bandes: Ek!s, Censura, La Jara, Lenincat, Kailash y Bloody Noses.
Suscríbite a les nuestres novedaes
