L’Asociación Grana, creada n’alcordanza de l’activista xixonesa Yolanda Huergo, ta acabante de dar a conocer la obra ganadora del so premiu d’ensayu, trátase de ¡Da-yos caña! El tiempu y el contestu d’una banda de Rock Astur, de la que ye autor Xune Elipe. Esti gallardón, de periodicidá biañal, tien como oxetivu fomentar la investigación en llingua asturiana en cualquiera de los ámbitos del conocimientu, visibilizándola como una ferramienta afechisca pa la producción académica.
L’ensayu ganador d’esta segunda edición del premiu céntrase nes circunstancies y socedíos más importantes a nivel asturianu y internacional, que posibilitaron el surdimientu d’un grupu como Dixebra nuna ciudá como Avilés. Nesti sen, trátense temes como la crisis del petróleu de 1973, la transición política nel Estáu español, la reconversión industrial, l’asturianismu modernu, el nacionalitarismu llibertariu, el movimientu punk, la música celta, la comunicación alternativa… acutando la última parte pa falar de les principales característiques de la banda: mestizaxe musical, repercusión pública, reivindicación llingüística, rellaciones lliteraries, obrerismu temáticu, ente otres. Nel testu tóquense cuestiones de calter históricu, social, cultural o llingüisticu, entellazaes con anécdotes rellacionaes con Dixebra o referencies bibliográfiques del autor.
Esti últimu, manifestaba que «Ye un honor ganar esti premiu, préstame pola vida, porque sentimentalmente representa muncho pa min, Yolanda foi y sigue siendo un referente pa toles persones que lluchamos por una Asturies y un mundo meyor». Del xuráu facíen parte Inaciu Galán (ganador de la edición anterior), Boni Pérez (escritor), Ánxelu G. Morán (escritor) y Esther Prieto (editora), faciendo de secretariu Pablo Rodríguez (periodista), quien otorgaron el gallardón por unanimidá, destacando nel acta que: «quixo rescamplar del trabayu premiáu’l so valir testimonial y l’análisis que recueye del contestu cultural, político-ideolóxicu y socioeconómicu nel que surdió una de les formaciones musicales más importantes de les últimes décades n’Asturies». L’actu d’entrega d’esti premiu -dotáu con 1.500 euros– va facese’l 12 d’avientu a les 18h nel Muséu Casa Natal de Xovellanos de Xixón.
La editorial Trabe va ser la encargada de la so publicación, na que va incluyise abondo material gráficu (cartelería, semeyes, pegatines, etc), bien d’ello inéditu. Esti volumen bien a sumase a otros anteriores asoleyaos pol mesmu autor, ente ellos Llingua y rock (1996), Rockmería. Un repasu a la música popular del sieglu XX (2009) o Hai una llinia trazada. Historia de la música asturiana (XXVI Premiu ‘Máximo Fuertes Acevedo’, 2022); amás foi guionista de la serie documental D’ayeri a güei (TPA), sobre’l devenir de la música del país desque hai rexistros sonoros, ye director del Anuariu de la Música Asturiana y coordina l’Archivu de la Música Contemporánea Asturiana (AMCA) y dirixe’l programa de RPA dedicáu a la música d’espresión asturiana Al Son.
Suscríbite a les nuestres novedaes
