La Llaboral Ciudá de la Cultura acueye dende esti martes 14 d’abril una edición nueva del alcuentru profesional Música en Rede, una cita clave dientro del programa Asturies, Cultura en Rede que convierte a Xixón nel epicentru del sector musical asturianu hasta’l xueves 16.
La xornada inaugural entama cola recoyida d’acreditaciones y documentación nel hall del Teatru de la Laboral, siguida d’una bienllegada institucional que da pasu a los primeros espacios de reflexón. La primer mesa redonda, dientro del bloque Conxustes I, aborda’l tema “Xéneru y industria musical. ¿Onde tamos en 2026?”, con participación de Lara Alcázar y Fee Reega, moderada por Sofía Castañón. La tarde complétase cola actividá profesional y los primeros conciertos del ciclu Llabor I, con actuaciones repartíes ente la Sala Albéniz y la Sala Acapulco: Tania Pereira, Pablo Valdés Trío, Tuya y Antonio Irún y los Lobos.
El miércoles 15 vien cargáu de conteníu dende primer hora. La mañana abre con Conxustes II: “Del aula al escenariu”, con Anxo Pintos y Mario Carrillo, moderáu por Rodrigo Joglar. Tres la pausa café, tien llugar el taller Erbíes I, centráu en «Cómo vivir de la música y los derechos d’autor«, con Patacho Recio. La xornada inclúi amás el Showcase Llabor II col Tino Di Geraldo Quintet nel Teatru de la Laboral y una espicha profesional na Sala de Pintures. Pela tarde desenvuélvense les Xuntes I (alcuentros comerciales), siguíes del taller Erbíes II, dedicáu a los cuidos na industria musical (salú física y mental), con Rosana Corbacho y Amaia Carnicer. Depués, llega Conxustes III, centrada nes oportunidaes d’internacionalización, con participación de Sekuens y Asturex. La nueche vuelve tar marcada pola música en directo con Llabor III: La Ciudá nel Mar, Asturiana Mining Company, Rubén Alba Band y Los Míticos del Chimborazo.
El xueves 16 va zarrar esti alcuentru con una última xornada d’actividá profesional. Pela mañana desenvuélvese Erbíes III, sobre movilidá internacional na industria musical, con Beatriz Ortega, siguida d’una pausa café y del taller Erbíes IV, dedicáu a la xestión de derechos musicales con Inés Cardero y Miguel Diéguez. Tamién hai espaciu pa los últimos alcuentros comerciales (Xuntes II) y una nueva mesa redonda, Conxustes IV, titulada “Lo moderno y lo tradicional: puntu d’alcuentru”, con Xosé Ambás, Leticia Baselgas y Ferla Megía. La música en directo vuelve ser protagonista cola sesión Llabor IV con Entós na Ilesia de la Llaboral y Llabor V, con Rubén Bada nes Cocines Vieyes de la Llaboral.
L’alcuentru va pesllase con un conciertu de clausura nel Teatru de la Laboral a cargu del grupu escocés Capercaillie, poniendo’l ramu final a trés díes d’intensa actividá profesional, artística y de creación de redes y faciendo conexón del arcu atlánticu con unu de los grupos qu’encabecen el cartelu del Festival Intercélticu de Lorient nesti añu 2026.
Suscríbite a les nuestres novedaes
