Yá ta a la venta’l tercer discu de L-R: ‘V.O.S’

Yá ta a la venta na tienda online y en toles plataformes musicales ún de los discos más esperaos del añu: V.O.S. El dúu post-folk formáu por Leticia Baselgas y Rubén Bada regresa con un tercer discu que supón un gran pasu alantre na so propuestra: Más instrumentación, más influencies d’otres sonoridaes (rock, funk, electrónica…), más collaboraciones (Rodrigo Cuevas, Los Hermanos Cubero, Eva Tejedor & Les Pandereteres, Juanjo Díaz, Coru Al Altu La Lleva, los bretones ‘Ndiaz), más color, más matices sonoros… Doce pieces que van presentase en directo mañana na sala Acapulco de Xixón, a les 20.30h y con un preciu d’entrada anticipáu de 12 €.

El tercer discu de L-R xuega con un conceptu clave: Versión Orixinal Subtitulada. A traviés d’él dan respuesta a la entruga cola qu’entamaben el so camín en 2016: «¿A qué suena un llugar na memoria colectiva?». Asina ye como V.O.S ye toa una declaración d’intenciones qu’entiende la “música tradicional” como un actu d’amor, como daqué qu’enxamás va ser orixinal, nin inamovible, porque siempre se tresmite como una versión.  Dende la so personalidá única, el dúu propón una serie de “subtítulos musicales”; capes sonores que se ponen enriba unes d’otres convidando a siguir imaxinando y enachando “la voz ensin nome” que puebla nes memories sonores colectives del pueblu asturianu.

El procesu de publicación d’esti discu remóntase a abril del añu pasáu, cuando presentaron el so primer single “Anda neña (xota ou dalgo“, cola collaboración d’El Coru Al Altu La Lleva. Llueu aportó “Trébole” (l.lixera), “Menodito” con Los Hermanos Cubero y va un par de selmanes “L.luna (agarráu)“, xunto a Rodrigo Cuevas. Toos estos cantares aportaron con unos orixinales videoclips -acordies al pesu que L-R dio-y siempre a la estética y a lo audiovisual- y yá adelantaben que la sonoridá de L-R taba n’evolución. Agora col discu enteru yá disponible, esto ye yá una confirmación.

Presentación en directo

L-R presenta l’álbum -qu’asoleya en CD y en vinilu- el sábadu 10 de febreru a les 20:30h na Sala Acapulco de Xixón. Les entraes pueden mercase tovía de forma adelantada na plataforma entradium con un preciu de 12 €; na puerta va ser de 15 . El conciertu promete ser una oportunidá única pa sintir al dúu formáu por Leticia Baselgas (voz y percusión) y Rubén Bada (guitarres eléctriques, loopers y efeutos) nuna formación distinta a la de davezu, cuntando cola participación d’otres compañeres de la escena musical asturiana y con el músicu mozu Ferla Megía como artista convidáu.

Merca los discos de L-R

Dexa un comentariu

X