«El bal-folk d’Urso Dakoff ye música tradicional asturiana reellaborada a la manera europea contemporánea»
Esta selmana presentábase al traviés de les redes sociales un nuevu proyectu de música asturiana, Urso Dakoff. La banda ta formada por tres veteranos de la escena musical del país, Pepín de Muñalén (Tuenda, La Bandina’l Tombo, Caldo y Os Rabizos) al violín, Rodrigo Joglar (Verdasca, LaKadarma) al curdión, y Miguel R. Monteavaro (Caldo y Os Rabizos, Mezá) a la flauta. En pallabres d’esti últimu, la intención del grupu ye facer «música tradicional asturiana reellaborada a la manera europea contemporánea».
«El bal-folk ye una etiqueta de folk baillable y escuchable européu. Respuende a los festivales de baille del centru d’Europa y que s’espardió pel restu del territoriu», comenta Monteavaro sobre esta etiqueta qu’utilicen porque «n’Asturies hai mui pocos grupos qu’usen esti sellu y en realidá lo que fai Urso Dakoff ta conectáu colo que tán faciendo en Galicia, en Cataluña, en Francia…».
Con un repertoriu formáu por música instrumental, el tríu va entamar a dar conciertos en febreru que van dir anunciando peles sos redes sociales. El flautista comenta que de primeres van ser actuaciones «per sitios d’aforu mui reducíu, pa entamar en chigres pequeños de pueblos y a partir d’ehí dir faciendo otres coses». Tamién tienen a la vista grabar daqué «nes próximes selmanes» y cuenten con incorporar «dos o tres temes cantaos de cara a una posible grabación». Les voces van poneles Monteavaro o Joglar y la llingua emplegada va ser «l’asturianu o gallegu».
La estética d’un faquir
«Urso Dakoff ye’l nome artísticu del faquir de Muñalén. Ehí hai un fakir que ta vivu, que trabayó en varios circos de renome internacional y por eso tenemos esa estética qu’amosamos nes semeyes que nos fizo’l fotógrafu llibanés Nabil Amhaz», esclaria Miguel R. Monteavaro sobre ún de los aspectos que de primeres más llamó l’atención del proyectu.
P’acabar, el músicu de Bual esclaria qu’esta banda en realidá nació a finales de 2019: «pensábemos qu’había inda muncho repertoriu que trabayar, ficimos el trío y llevamos ensayando dende aquella, pero pillónos la pandemia, los confinamientos, zarros perimetrales y tuvimos una actividá intermitente». Sicasí, dende’l branu pasáu yá trabayen «en serio, con intención de qu’en 2022 yá salga too palantre», y por eso escoyeron esti momentu pa presentar el proyectu.
