La gaita, el baille y el paisaxe d’Asturies protagonicen el cartelu del Festival Intercélticu de Lorient

Del 5 al 14 d’agostu de 2022 va cellebrase en Bretaña la 51 edición del Festival Intercéltique Lorient, qu’amás tien la particularidá de que va tar dedicada a Asturies y de que ye la primera depués de 14 años que nun ta dirixida pol llavianés Lisardo Lombardía. Si’l mes pasáu dende’l festival confirmaben los primeros nomes asturianos que van sonar –L-R, Cerezal, José Manuel Tejedor y Silvia Quesada-, agora presenten la imaxe del cartelu d’esta edición.

«Adientrase dafechu nos paisaxes accidentaos y montañosos d’Asturies. Un vientu del sur sopla hacia Bretaña, caleciendo la capital intercéltica». Con estes pallabres la organización del festival resume la idea que quier tresmitir el cartelu. Amás, na nota prensa sorrayen la importancia que tien la gaita y el baille na cultura asturiana: «Nun primer planu, destaquen les siluetes d’una banda gaites y de xente baillando. Repara nello, vas poder sentir el ritmu impulsáu polos tambores, les alegres melodíes de les gaites, los vestíos de les baillarines colos brazos n’alto. Son los acordes de la Celtia del Sur qu’entamen a aportar a Lorient»

Músicos asturianos

Nesta 51 edición del Festival Intercélticu de Lorient el dúu post-folk formáu por el Leticia Baselgas y Rubén Bada, L-R, va actuar el 5 d’agostu, mentes que la banda folk-pop Cerezal va facelo’l 11 d’agostu. Los dos toquen nel escenariu Le Kleub, ún de los seis espacios de conciertos que tien habilitaos el mayor eventu del mundu celta. Amás, el gaiteru José Manuel Tejedor y la cantante Silvia Quesada van participar el 12 y 13 d’agostu en ‘Celtic Odysée‘, un espectáculu nel que van xubir al escenariu 18 artistes de les ocho naciones celtes baxo la dirección artística del bretón Roban Le Bars.

Dende’l festival presenten ‘Celtic Odysèe’ como un «viaxe musical del sur al norte a traviés del arcu atlánticu celta» y nél van tar los y les cantantes Karen Matheson (Escocia), Denez Prigent (Bretaña), Karan Casey (Irlanda), Cerys Hafana (Gales), Fransy González (Galicia), Silvia Quesada (Asturies) y Lauren Chandler (Cornualles); el vigulineru y pianista Donal O’Connor (Irlanda); el gaiteru José Manuel Tejedor (Asturies); el vigulineru Tomas Callister (Isla de Man); l’acurdionista y pianista Donald Shaw (Escocia); Adam Rhodes (Isla de Man) al bouzouki; Niall Vallely (Irlanda) na concertina; y acompañando a Ronan Le Bars a les uilleann pipes, los bretones Liam Roudil a la guitarra, Pierrick Tardivel al contrabaxu, Aymeric Le Martelot a los teclaos y Thomas Bessé a la batería.

Comprar discos folk na tienda online