«El Breizh-Asturies Project son canciones del repertoriu asturianu interpretaes cola visión musical de los bretones»
El próximu vienres 5 d’agostu arranca la 51 edición del Festival Intercélticu de Lorient, l ‘eventu más grande del mundu celta qu’esti añu tien a Asturies como convidada d’honor. Con una programación na que van participar más de venti artistes del país, ún de los espectáculos que destaca pola so orixinalidá ye’l Breizh-Asturies Project, que vuelve a representase nun escenariu 10 años dempués.
El Breizh-Asturies Project nació va una década de la mano de los músicos bretones Fañch Loric y Nicolás Radin y d’aquella participaron les cantantes asturianes Clara Amieva y Lorena Rodríguez. De cara a la edición de Lorient d’esti añu, la formación renovóse y sustituyó les voces poles de Leticia Baselgas y Silvia Quesada, dambes compañeres nel grupu Calea y vocalistes nuna montonera proyectos musicales a lo llargo la so carrera (L-R, Tejedor, Blima, Los Gatos del Fornu, Muyeres…).
«Básicamente ye xuntar música asturiana con mogollón d’arreglos y un flow mui bretón, sobre too vinculáu a la Fest-Noz, a la danza, a que la xente baille», desplica Leticia Baselgas sobre’l proyectu. Silvia Quesada añade amás que «tol repertoriu ye asturianu, pero interpretáu cola concepción musical que tienen los bretones, que son canciones mui llargues, mui repetitives». D’esta manera les voces y panderetes asturianes améstense a acordiones y binioù y bombarde bretones, amás de a una formación eléctrica de baxu, guitarra y batería.
«Ye mui interesante porque de repente tienes una danza asturiana, pero ellos entiéndenla como un An Dro. Entós tolos arreglos van rellacionaos con que la xente baille l’An Dro, pero al final ye una danza asturiana», pon d’exemplu Baselgas, qu’afirma sentise «mui contenta» por participar nesti espectáculu «que venceya música asturiana y bretona d’una manea mui heteroxénea». La representación va ser el sábadu 6 d’agostu a les 22h nel escenariu Quai de la Bretagne del Interceltique Lorient.
