El 25 de payares del 2021, con motivu de la Selmana Europea de Prevención de Residuos, el Conceyu de Cangues d’Onís acoyó un conciertu-taller de música reciclao dirixíu pol multiinstrumentista David Varela. Güei esa actividá representa a Asturies en Bruxeles, nos Premios Europeos de Prevención de Residuos, dempués de que COGERSA lo escoyera como ún de los proyectos finalistes. El 9 de xunu va sabese’l resultáu.
«Suena’l teléfonu y entruguen que, yá que toco con «gaites-guante», escobes, serruchos y tubería de PVC, si podría dirixir una banda de músicos reciclaores, na que construyen los sos propios instrumentos. Y de sópitu, Embaxador Musical de COGERSA pa los actos de la Selmana Europea de la Prevención de Residuos», d’esta manera presentaba Varela nes sos redes sociales esti conciertu-taller nel que l’alumnáu de la Escuela de Música del conceyu construyó los sos propios instrumentos con materiales y envases reutilizaos y llueu remató con una actuación de música tradicional asturiana na que sonaron cuchares, botes, llates, cepillos, la llata pimentón, etc.
Esti videu resume lo qu’ehí pasó y foi’l qu’usó’l Conceyu de Cangues d’Onís pa presentar la so candidatura a los XII Premios Europeos de Prevención de Residuos. COGERSA lo seleccionó ente más de 140 candidatures, xunto a otros cuatro proyectos d’otros ámbitos, y el 9 de xunu va sabese si en Bruxeles van premiar a la música asturiana reciclada.
Suscríbite a les nuestres novedaes
