A finales de xunetu Candás va acoyer la XXIX edición del Festival de Bandes de Gaites Villa de Candás y nél vuelven a celebrase el Concursu de Pareyes de Gaita y Tambor “Memorial Diego Alonso” y el Concursu de Cuerpos de Percusión. La Banda Gaites Candás, organizadora del certame, ta acabante de facer públiques les bases pa poder inscribise enantes del 21 de xunetu nesti gallardón.
El primeru de los certámenes, dedicáu a les pareyes de gaita y tambor, ta abiertu a cualquier persona a títulu individual, ensin necesidá de representar a nenguna asociación nin colectivu. La competición va entamar a les 19h del 24 de xunetu y cada pareya va interpretar dos pieces: una obligatoriamente asturiana y otra de llibre elección. Les actuaciones nun va poder pasar de los ocho minutos nin ser inferior a cinco y los participantes han vistir col traxe’l país.
El xuráu, compuestu por trés miembros nomaos pola organización, va valorar aspectos como la técnica, afinación, recursos interpretativos, empaste y dificultá de les pieces. El primer premiu ye de 200 euros; el segundu de 150 euros y diploma; y el terceru de 100 euros.
D’otra banda, el Concursu de Cuerpos de Percusión va entamar a les 18h del mesmu día y ta dirixíu a agrupaciones pertenecientes a bandes de gaites, independientemente de la so procedencia. Les actuaciones han realizase esclusivamente con preseos de percusión non melódicos, quedando fuera instrumentos como marimbes, xilófonos o vibráfonos.
Cada cuerpu de percusión ha presentar un solu con una duración mínima de trés minutos y máxima de seis. El xuráu valorará la afinación, los arreglos, la dificultá y los recursos técnicos ya interpretativos y los trés premios van ser de diplomes y 250 euros, 200 y 150 euros respectivamente.
Con esta anuncia, el Festival de Bandes de Gaites Villa de Candás entama a dar novedaes de la edición númberu ventinueve d’esti eventu qu’enllena de música tradicional la capital de Carreño l’últimu fin de selmana de xunetu.
Suscríbite a les nuestres novedaes
