El Festival de la Cerveza Artesano d’Asturies, La Flor de L.lena y la Espicha de Fitoria anuncien feches

Mañana entama abril y yá tán marcaes nel calendariu dalgunes de les cites más relevantes cola música’l país d’esti mes y del próximu. Amás de la Folixa na Primavera de Mieres -qu’arranca esti fin de selmana-, del 11 al 13 d’abril Llangréu va acoyer el Festival Internacional de la Cerveza Artesano d’Asturies; La Pola celebra’l XX Mercáu Tradicional La Flor de L.lena del 25 al 27 d’abril; y el Grupu Baille Tradicional Fitoria anuncia tamién la XX Espicha Fitoria el 10 de mayu.

El Festival Internacional de la Cerveza Artesano d’Asturies ta desvelando estos díes a traviés de les sos redes sociales la programación de los conciertos que van cellebrase nos Xardinos de la Pinacoteca Eduardo Úrculo (La Felguera). El platu gordu pol so formatu y orixinalidá va ser l’espectáculu País Punk Rock, un homenaxe al punk-rock asturianu nel que 15 músicos van tocar repertoriu de clásicos del xéneru, incluyendo temes de grupos como Dixebra, Los Berrones, Desakato, Misiva, Skontra, Ochobre, Misiva o La Morgue. La banda va tar formada por Dani León y Juan Bertrand (guitarres), José Manuel Tejedor (gaita), Luis Vázquez de la Torre (batería) y Carlos Álvarez (baxu) y van poner voz cantantes como Ramón Blanco, Xune Elipe, Marisa Valle Roso o Pablo Senator. La cita va ser el vienres 11 a la medianueche y l’eventu yá anunció tamién otros conciertos rellacionaos cola música n’asturianu pa esi día: Skontra a la 1.30h la madrugada y Lady Llagar a les 22.30h.

Na cuenca vecina del Caudal l’últimu fin de selmana del mes ye la festividá de La Flor y del 25 al 27 d’abril va celebrase nel barriu La Caleya de La Pola el Mercáu Tradicional de La Flor qu’esti añu llega a la so venti edición. La Banda Gaites Güestia -organizadora de la cita dende va unos años- entá nun anunció la programación, pero como ye vezu la música del país va tar bien presente.

Pa rematar esta tanda de nuevos eventos confirmaos ta la XX Espicha de Fitoria (Uviéu). El Grupu de Baille Tradicional Fitoria va entamar esta cita’l sábadu 10 de mayu y nella van tocar Los Gascones, Fitiriteres, Los Llerones y Rellume -que van estrenase enriba d’un escenariu nesti eventu-. La espicha abre les puertes a les 20h y la entrada tien un preciu de 15 € anticipada y 20 € na puerta.