Del 4 al 7 de setiembre va tener llugar la XVIII edición del Festival Internacional de la Gaita (FIG). La organización del festival presentó el pasáu sábadu la programación, calteniéndose a la altura de les ediciones anteriores.
Van participar grupos como La Bandina Los Muíles, los gallegos Böj, Pandereteros d’Anguañu, Felpeyu, el trío Borja Baragaño, Simon Bradley y Julio Rodríguez, Soi Panderetera, la gaitera escocesa Malin Lewis. El Grupu de baille «San Félix» de Candás, N’Ochebre, Skama la Rede, la bandina Los Collaínos, la Bandina Camín d’El Carmín, los escolinos y profesores de la BGV «El Gaitero», Carlos Velasco y Chino «El Indio», la Bandina l’Emboláu, el Grupu Etnográficu l’Oriente, la Banda de Gaites Cabu Peñes, la Banda de Gaites Candás, la Banda de Gaitas Xinzo de Limia, Roncones y Sonajas, l’Albokariak Herri Arte Skola-Kao y la propia BGV El Gaitero.
Tocantes a los eventos del festival, anuncióse’l XV Concursu de Gaiteres y Gaiteros «Memorial José Huerta», la Esposición: «Asturies n’otra dómina: Munchu más que ropa», el mercáu tradicional de FIG, el VI Certame de Canción Asturiana «Xavi Solares» y el VII Alcuentru d’Artesanos d’instrumentos musicales tradicionales del FIG.
Esti añu la gaitera Malin Lewis va poner una clase maxistral de gaita, y Balbino Fernández y Ricardo Soberado van dar la charra: «El floréu de Gaita Asturiana». Amás, el gaiteru ya inxenieru Pelayo Fernández va facer un taller sobro «La Fabricación del payón y axuste del roncón na gaita asturiana», y Ana Feito va facer otru taller d’averamientu a la Música Tradicional pa neñes y neños.
Too ello amuesa que’l festival sigui ufiertando una de les progamaciones más variaes y completes de la escena asturiana, con grupos emerxentes a la par que formaciones de renome na escena nacional y internacional, talleres, pasucáis, charres, muestres, mercáu… La presentación entá dexó grupos por confirmar, que van dir anunciando d’equí a setiembre.
Amás, el festival va sacar un crowdfunding col que poder sofitar el proyectu, col merchandising de la edición d’esti añu.
Suscríbite a les nuestres novedaes
