Ye evidente que dende hai unos pocos años pa equí ta produciéndose un españíu cultural nel qu’estremaos pueblos del mundu reivindiquen la so propia identidá y los sos raigaños musicales dende una perspectiva actual. El fenómenu nun ye nuevu y el tan recurrente binomiu de «tradición & modernidá» tuvo distintes espresiones a lo llargo de la historia de la música contemporánea. Sicasí, nos últimos tiempos, ta produciéndose en territorios más diversos, la música electrónica y urbana ta xugando un papel más importante nesta interrellación y el resultáu ta aportando a públicos más bayurosos. Esti fin de selmana van actuar n’Asturies cuatro exemplos d’esta fola: Boyanka Kostova, Delameseta, El Naán y el El Gato con Jotas.
Los primeros d’ellos son Boyanka Kostova. A les 21.30h la sala carbayona Lata de Zinc acueye a esti dúu formáu por Cibrán García y el polifacéticu Ortiga (Chico do Funk), que son los pioneros del trap gallegu. Na so propuesta pue sentise «retranca gallega, folclore, ritmos tradicionales, soníos urbanos, contemporáneos y electrónicos, loops d’efectos, samples, caxes de ritmos…», como dicen dende’l so sellu, Ernie Records. El resultáu ye lo que definen como «puru flow rural. Trap d’aldea, pero universal«.
Tamién en Lata de Zinc a les 21.30h, pero al día siguiente, actúen Delameseta. Proyectu de dos xóvenes vallisoletanos que presenten la so propuesta como «folclorismu urbanu». «Panderetes y sintetizadores son la base pa la reivindicación de la cultura popular dende’l presente: la pista de baille, el club, la plaza, el festival o la rave» dientro d’un proyectu que «percuerre los soníos de Castiella dende una perspectiva actualizada». Nel so conciertu d’Uviéu van tar acompañaes por Les Pites, estes bailladores que se xunten ensin complexos nin dogmes pa disfrutar llibremente del baille’l país.
D’otra banda, esti sábadu 20 dende les doce la mañana La Benéfica de Piloña acueye’l Vermutazu ente pegollos, cita qu’esti espaciu cultural entama anualmente en collaboración cola AMC Bocanegra. Nesta ocasión amás d’una sesión de La Güeriata -DJ que siempre tien presente a la música’l país-, de Sergi Estela y del conciertu de Girls To The Front -banda na que participen artistes de la música n’asturianu como Mapi Quintana, Alicia Álvarez o Eva Toca-; va haber les actuaciones d’El Naán y d’El Gato con Jotas.
El Naán ye una banda palentina que, como ellos presenten, «rabila pel espíritu étnicu de la música tradicional ibérica» pa facer una «creación vanguardista que naz de la tradición lírica popular«. D’esta manera, los ritmos y instrumentos de raigañu entemécense con músiques contemporánees, étniques, jazz o folk«. La desaparición de las luciérnagas ye l’espectáculu col qu’aporten a L’Infiestu.
Pa rematar ta El Gato con Jotas col so espectáculu Electrojota. El músicu, intérprete, folclorista, performer y productor d’espectáculos musicales y conteníos audiovisuales, l’extremeñu Sergio Gómez «El Gato», ye’l responsable d’esti proyectu que trabaya col folclor «dende una perspectiva heteroxénea, inclusiva y contemporánea«. Asina ye como «soníos d’antaño axúntense a estilos musicales como la electrónica, dance y reggaeton» xunto col «teatru, la danza, la poesía y lo audiovisual».
Suscríbite a les nuestres novedaes
