Yá ta abierta una convocatoria nueva d’Asturies Cultura en Rede, el circuitu qu’entama la Sociedá Pública de Xestión y Promoción Turística y Cultural del Principáu d’Asturies pa promover a lo llargo de los conceyos del país eventos musicales; de divulgación de la historia, l’arqueoloxía, el patrimoniu, la cultura popular y la tradición asturiana; d’artes escéniques y de lliteratura. Hasta’l 27 de marzu ta abierta esta nueva convocatoria pa la selección de proyectos y ellaboración de catálogos que valgan como base pa la programación en sales o espacios culturales dende’l 1 de xunetu hasta’l 31 d’avientu del 2025.
Pa poder participar nel circuitu de Música y Artes Escéniques ye necesario que los proyectos nuevos s’inscribieren al Catálogu de l’Actividá Musical Asturiana enantes del 7 de febreru. Nel casu de los espectáculos que yá tean incorporaos, nun ye necesario volver a tramitar la so incorporación; queden formando parte del catálogu pal periodu señaláu. La Conseyería va garrar esti catálogu como base pa la programación del Circuitu de Música del programa Asturies, Cultura en Rede.
Los proyectos de divulgación de la historia, l’arqueoloxía, el patrimoniu, la cultura popular y la tradición asturiana -estaya baxo la que s’alcuentren espectáculos de música tradicional– tamién pueden presentase a la convocatoria. Na web d’Asturies Cultura en Rede tán les bases al completu, la convocatoria y tola información complementaria.
Suscríbite a les nuestres novedaes
