La Conseyería de Cultura, Política Llingüística y Deporte del Principáu d’Asturies convocó va unes selmanes les subvenciones «pa la realización de festivales y actividaes culturales complementaries» y pa «actividaes culturales d’interés rexonal y acciones de formación y movilidá» con una dotación total de 300.000 € y 140.000 € respectivamente y un plazu de presentación de proyectos hasta’l 7 de mayu. Per otru llau, el Ministerio de Juventud e Infancia del Estáu español convocó delles llinies d’apoyu dientro de les «Ayudas Injuve para la Creación Joven 2024-2025», con una financiación que va dende los 5.000 € hasta los 10.000 €.
Esti añu ye’l primeru que’l gobiernu asturianu convoca les subvenciones «pa la realización de festivales y actividaes culturales complementaries». Nelles tán contemplaes cuatro llines d’actuación: entidaes ensin ánimu de llucru per un llau y profesionales y persones xurídiques pa entamar «grandes festivales» con un presupuestu d’ente 30.000 € y 250.000 €. La partida total destinada pa tolos proyectos ye de 100.000 € (la metá p’asociaciones y la metá pa profesionales y empreses); entidades llocales pa cualquier tipu de festival, con una dotación de 75.000 €; y entidaes ensin ánimu de llucru y profesionales y persones xurídiques pa entamar festivales que tengan un presupuestu ente los 6.000 € y los 30.000 €. Nesti casu la dotación total ye de 100.000 € pa entidaes non llucratives y de 25.000 € pa profesionales y empreses. Yá puen consultase toles bases, la convocatoria y acceder a la fueya de serviciu.
Per otru llau, el Principáu vuelve a convocar les subvenciones pa «actividaes culturales d’interés rexonal y acciones de formación y movilidá» destinaes a particulares, fundaciones y asociaciones. Acordies a la indicao na fueya de serviciu y na convocatoria, la Conseyería financiará como máximu 6.000 € pa actividaes culturales; 2.000 € pa xires, feries y eventos espositivos internacionales; 1.500 € pa xires, feries y eventos espositivos dientro del Estául español; 1.000 € pa formación internacional y 600 € pa la formación d’ámbitu estatal. Amás d’esto, esclarien que «l’aportación máxima de la Conseyería de Cultura, Política Llingüística y Deporte nun va poder superar el 50% del presupuestu del proyectu».
Ayudes Injuve
D’otra banda, el gobiernu español tien abiertu hasta’l 20 de mayu el plazu pa presentar solicitúes pa les ayudes a la creación xoven del que yá ta publicada tola información. Trátase «d’una subvención dirixida a creadores d’hasta 30 años (hasta 35 pa los proyectos d’emprendimientu) pa facer proyectos d’investigación, producción, movilidá, emprendimientu y comisariáu de la Sala Amadís (sala d’esposiciones propia del Injuve) nos ámbitos de les artes escéniques, les artes visuales, el cómic y la ilustración, el diseñu, la literatura y la música durante l’añu 2025. Nelles finánciase con hasta 5.000 € tanto la producción d’una obra artística del calter que seya como la movilidá d’esa obra en festivales o xires.
Suscríbite a les nuestres novedaes
