La Fabriquina edita’l llibru-CD ‘Canciones pa la Xentiquina’

Les voces de Xentiquina vuelven a sonar gracies a La Fabriquina. La editorial capitaneada por Alicia Álvarez (Pauline en la Playa) y el músicu, académicu de la llingua y escritor David Guardado, homenaxea a ún de los nomes más importantes de la música asturiana col llibru-discu Canciones pa la Xentiquina. Una selección sentimental de Nacho Fonseca. Esta obra axunta diez temes escoyíos pol propiu Nacho Fonseca, creador de los famosos coros d’escolinos Seliquín y Xentiquina y autor de la banda sonora de la infancia de delles xeneraciones n’Asturies; too ello acompañáu coles ilustraciones de Bitxo, dellos testos alrodiu’l proyectu y les lletres de los cantares.

Xentiquina ye una de les formaciones musicales más importantes pa la llingua asturiana, yá que foi l’únicu grupu formáu esclusivamente por neños y neñes y, per 25 años, foi la única formación que facía cantares n’asturianu pa la reciella. La so historia ye inseparable de la del mayestru Nacho Fonseca, que nel cursu 1986-1987 cuando daba clases en Porrúa, decidió facer un grupu musical con dellos de los sos escolinos. Llamáronse Seliquín y llegaron a grabar un discu. Col treslláu de Fonseca a dar clases a Lieres, ésti reconvirtió’l proyectu en Xentiquina. Foi una revolución pa la música n’asturianu, una ferramienta imprescindible pal enseñu, normalización y tresmisión de la nuestra llingua y tou un éxitu a lo llargo de tres décades en siete esitosos discos.

Tres de la publicación del so últimu discu en 2009, El Sapu y la Lluna, y de la xubilación de Fonseca, La Fabriquina fai agora por que’l so llegáu siga pasando de xeneración en xeneración. D’esta manera, Canciones pa la Xentiquina ye una esbilla de diez cantares que foron seleccionaos pol mesmu autor a partir de los sos recuerdos y emociones, tantos como, de xuru, espertaron nes neñes y nos neños que crecieron imaxinando l’asientu tocín de la moto de Pachín, esi cañicón que raspiaba’l cielu o aquel vieyu sultán qu’iguaba los conflictos xugando al parchís.

Doble oxetivu

Completen esta nueva obra les ilustraciones de l’artista asturiana Bitxo, que s’encarga d’aportar, dende’l so propiu universu poéticu, color, tenrura y imaxe a les lletres de les canciones que se pueden escuchar nel CD incluyíu nel interior. Con esta creación, La Fabriquina cumple dos deseos: dar continuidá con un segundu númberu a la colección de música infantil n’asturianu entamada pol llibru-discu Kikirikikí, canciones pa neñes y neños d’Alicia Álvarez, y, amás, rendir homenaxe a Nacho Fonseca, fonte contínua d’inspiración y ferramienta, tovía güei, indispensable na normalización del asturianu.  

Merca los discos de Xentiquina y Seliquín

Dexa un comentariu

X