El Gobiernu del Principáu d’Asturies ta acabante d’anunciar la programación completa de los actos conmemorativos del Día d’Asturies. Anguaño celébrense na Ría del Eo, nos conceyos de San Tiso d’Abres, Castropol y A Veiga. La música n’asturianu y eonaviego va tar presente ente la bayura d’actividaes coles actuaciones de Bacotexo, José Manuel Tejedor, Mostru l’Horru, Marisa Valle Roso y delles agrupaciones tradicionales y intérpretes d’asturianada.
Mercaos tradicionales, muestres de gastronomía, exhibiciones de deportes y xuegos autóctonos, actividaes infantiles, espectáculos de cai, vistes guiaes al patrimoniu históricu y natural, talleres y propuestes pa tolos públicos dan forma a la programación que va repartise per A Veiga (sábadu 5), San Tiso d’Abres (domingu 6), As Figueiras (llunes 7) y Castropol (martes 8).
Les actividaes de música n’asturianu y gallego-asturianu entamen el sábadu 5 n’A Veiga a les 12 la mañana con un pasucáis de la Banda Gaitas El Penedón de Castropol y, a les 14h nel Parque de Medal, una muestra d’asturianada de l’Asociación de Cantantes y Folclore del Valle del Nalón. Pela nueche’l rock protagoniza los conciertos, coles actuaciones de Bacotexo (20.30h) y Los Berrones (22h) nel Parque de Medal.
El domingu 6 los actos treslládense al Área Recreativa d’O Piñeiro, en San Tiso d’Abres y arranquen a les doce la mañana con una pareya de gaita y tambor. A la una’l mediudía hai tonada cola Asociación d’Intérpretes de Canción Asturiana (AICA) y a les 14h toca’l míticu gaiteru José Manuel Tejedor. Yá pela nueche llega’l momentu del rap n’asturianu con Mostru l’Horru (20h).
El llunes 7 nel puertu d’As Figueiras actúa Marisa Valle Roso a les 21.30h y, pa rematar la programación musical d’estos actos, el martes 8 de setiembre hai en Castropol pasucáis de la Banda de Gaitas El Penedón (12h), muestra d’asturianada cola Asociación Cultural Canción Asturiana Narcea (paséu del muelle, a les 13h) y pasucáis a les 14.30h cola Banda de Gaitas Oso Pardo de Navia. Con esta programación el gobiernu asturianu afonda na so propuesta de modelu itinerante y diversu nel que, musicalmente, recueye con aciertu la variedá de soníos que se faen na escena’l país, recoyendo esti añu propuestes rock, música tradicional, rap, canción d’autor y asturianada.
Suscríbite a les nuestres novedaes
