La Conseyería de Cultura, Política Llingüística y Deporte va celebrar esti martes, 22 de setiembre, el Día Européu de les Llingües con un alcuentru abiertu al públicu que va axuntar distintes esperiencies al rodiu la diversidá llingüística en LABoral Centru d’Arte y Creación Industrial de Xixón. La cita va empezar a les 19h y va ufrir una programación qu’entemez diálogu, lliteratura y música, siendo la poeta Sofía Castañón y un cuartetu de cuerda de la Orquesta Sinfónica del Principáu d’Asturies (OSPA), les encargaes d’axuntar poesía y son.
La conseyera de Cultura, Política Llingüística y Deporte, Vanessa Gutiérrez, va abrir esti eventu que propón mirar la realidá plurilingüe d’Europa dende Asturies y asitiar l’asturianu y l’eonaviego nesi contestu de riqueza y diversidá cultural. Asina ye como l’actu inclúi una mesa redonda dedicada la convivencia ente llingües, el plurillingüismu y la multiculturalidá, tanto dende l’ámbitu social como dende la creación cultural; y nella van participar el subdirector de Política Llingüística, Nicolás Bartolomé; la directora de LABoral, Semíramis González, y el periodista y especialista en llingua asturiana Inaciu Galán.
La última parte del alcuentru va treslladar esa diversidá al terrén de la creación. La escritora Sofía Castañón va realizar delles intervenciones poétiques, que se van alternar coles pieces musicales interpretaes por un cuartetu de cuerda de la OSPA, nun piesllle concebíu como un diálogu ente pallabra y música.
La celebración asturiana adelántrase cuatro díes a la fecha oficial del Día Européu de les Llingües, que se conmemora cada 26 de setiembre. La iniciativa nació en 2001, mientres l’Añu Européu de les Llingües promovido conjuntamente pol Conseyu d’Europa y la Unión Europea, y dende entós convirtióse nuna cita añal pa poner en valor la diversidá llingüística y cultural, favorecer l’aprendizaxe d’idiomes y l’entendimientu ente cultures y recordar la importancia de protexer el patrimoniu llingüísticu européu.
Europa cunta con más de 225 llingües autóctones, a les que se suman les munches que formen parte de la sociedá europea como resultáu de los movimientos migratorios. Dientro d’esi mosaicu, l’asturianu y el gallego-asturianu tán venceyaos dende va sieglos al territoriu, la cultura y la vida de xeneraciones d’asturianos y asturianes y formen parte d’un patrimoniu que se caltien vivu al traviés del so aprendizaxe, el so usu y la so tresmisión. Dambes llingües tán, amás, incluyíes nel marcu de protección de la Carta Europea de les Llingües Rexonales o Minoritaries.
Suscríbite a les nuestres novedaes
