La escena asturiana sigue medrando con propuestes nueves y orixinales. La selmana pasada presentóse a traviés de les redes sociales Mediaoreya, un cuartetu qu’aporta al folk asturianu con una formación distinta a lo que suel vese nesti estilu. El grupu ta integráu polos músicos mozos yá componentes d’otros proyectos Irene Vioque (Xara) al vigulín, Celia Nieto (Corquiéu, Entós, Draque, La Ciudá nel Mar) al vigulín, Julio Rodríguez (Llan de Cubel, Draque, Loína) al vigulín y Pablo Fernández (Alienda, Rellume) a la guitarra. Yá publicaron n’Instagram un videu con ún de los sos temes y el próximu vienres 17 de xunetu a les 21.30h van estrenase en directo con un conciertu na Taberna Cuévano de La Pola Siero.
¿Cómo surde Mediaoreya?
Mediaoreya surde en L’Esperteyu, que funciona un poco como’l nuesu epicentru “folkie”, ente sesiones, conversaciones, slow sessions y dalguna qu’otra cerveza. Plantegóse la idea de facer un grupu col vigulín como puntu d’alcuentru. Conocémonos dende va unos años y tamos siempre en conciertos, festivales y cursos como’l de les Xornaes del Vigulín, de L’Infiestu.
«El vigulín ye’l puntu d’unión, el xermen del grupu. Al ser varios podemos xugar coles voces, facer adornos y armoníes con una testura diferente a la que tamos avezaos, y la guitarra súmase a esi acompañamientu y aporta l’énfasis rítmicu»
Sois trés vigulinos y una guitarra, daqué a lo que nun tamos avezaos na escena asturiana. Si podéis afondar más nesta propuesta musical.
El vigulín ye’l puntu d’unión, el xermen del grupu. Al ser varios podemos xugar coles voces, facer adornos y armoníes con una testura diferente a la que tamos avezaos, y la guitarra súmase a esi acompañamientu y aporta l’énfasis rítmicu. Tovía mos queda muchu qu’esperimentar con esta formación, añadiendo efectos, asignando diferentes roles… ye daqué que mos entretien.
¿Qué tipu de repertoriu trabayáis? ¿Asturianu, d’otros territorios, hai temes de composición propia?
Trabayamos repertoriu folk, tanto bebiendo d’eses fontes que consideramos tradicionales como d’influencies y composiciones modernes. Son pieces vieyes y nueves, toes avezaes a ritmos y melodíes presentes na música de tradición oral que se recoyó dende finales del sieglu XIX. Pero fuera d’esi puntu de partida, nun pretendemos dibuxar más fronteres: lo que mos guste y mos de xuegu, pa dientro va.
«Trabayamos repertoriu folk, tanto bebiendo d’eses fontes que consideramos tradicionales como d’influencies y composiciones modernes. Fuera d’esi puntu de partida, nun pretendemos dibuxar más fronteres: lo que mos guste y mos de xuegu, pa dientro va»
Yá sacastis un videu de presentación col tema ‘Sastre’.
Ye un tema compuestu por Julio va munchu tiempu qu’éntá nun tenía nome. Como ye de los que más-y presten a Pablo, dedicó-ylu. El nome vien de que la casa de Pablo yera la casa vieya del sastre del pueblu.
¿Tenéis intención de dir sacando más pieces y/o entrar a grabar nel estudiu?
Pel momentu la intención ye entamar a movese, dase a conocer con conciertos y dir definiendo’l soníu y la manera de trabayar. Plantegamos siguir sacando conteníu y grabar daqué nel estudiu, pero nun tenemos una fecha afitada.
«Mediaoreya yera un vigulineru d’El Franco que, según cuenten, tando un día echando un pigazu sufrió de manera inesperada l’ataque xabaz d’un gochu y quedó namás con media oreya»
¿Por qué esi nome pal grupu?
Mediaoreya yera un vigulineru d’El Franco que, según cuenten, tando un día echando un pigazu sufrió de manera inesperada l’ataque xabaz d’un gochu y quedó namás con media oreya. Fízonos gracia…
Una de les particularidaes ye que Mediaoreya ta formada por xente que yá tais n’otros grupos y tenéis una componente de Madrid. ¿Cómo xestionáis esto y cómo vos condiciona?
La verdá que paez que mos gusta complicanos más el día a día. Sí, toos formamos parte yá d’otros proyectos, pero equí somos cuasi de la mesma quinta y el grupu parte más dende esa amistá previa. La ilusión de tocar xuntos ye los que mos mueve a echalo p’alantre. Hai que facer tetris pa buscar requexos pa ensayar, pero pasámoslo bien, compensámoslo asina. Irene, anque vive un pocu más lloñe, tira bastante p’Asturies y aprovechamos eses escapaes pa ensayar. Proponemos idees a distancia, y dalgunos grabamos maquetes en casa y llueu xuntámonos pa desplicales al restu y ver cómo funcionen. Güei nun ye mui difícil, nun nos podemos quexar.
«Toos formamos parte yá d’otros proyectos, pero equí somos cuasi de la mesma quinta y el grupu parte más dende esa amistá previa. La ilusión de tocar xuntos ye los que mos mueve a echalo p’alantre»
¿Qué esperáis aportar a la escena musical asturiana?
Nun pensamos nun oxetivu claru o daqué específico qu’aportar a la escena. Nós queremos tocar xuntos y pasalo bien, con un repertoriu animáu, cañeru y un poco distintu. Si somos quien a que la xente lo pase igual de bien sintiéndonos, zárrase’l ciclu y quedamos satisfechos.
¿Cuáles son los planes futuros ¿Hai más conciertos amás del d’El Cuévano del 17 xunetu?
Pel momentu, la idea ye tocar y pasalo bien. El resto, vamos viéndolo adulces. Acabamos de facer un Instagram, podéis buscanos y debéis siguinos. Pondremos ehí dalgún tema más y les feches de los próximos conciertos. ¡Ah! Y podéis y debéis llamanos pa tocar en tolos eventos que queráis.
Suscríbite a les nuestres novedaes
