Cada vegada son más les bandines tradicionales que surden n’Asturies y les actuaciones que dan per fiestes y eventos de calter estremáu. Tamién equí hai unes cuantes charangues contemporánees que colos sos vientos y percusiones animen folixes tocando temes populares. Axuntar l’espíritu d’estos dos tipos de formaciones ye l’oxetivu de Los Pelagatos, charanga integrada por una formación moza de trés gaites, caxa, bombu y acordión qu’interpreta repertoriu tradicional y actual. Hai unos meses asoleyaron el so primer tema -una versión de ‘20 de abril‘ de Celtas Cortos-, esti fin de selmana animaron el Tolivia Fest y siguen trabayando en proyectos orixinales pa esparder la so música perdayuri. Falamos con ellos pa conocer meyor la so propuesta.
¿Cómo, cuándo y por qué surde Los Pelagatos?
La formación naz d’una forma mui curiosa. Moisés, Samuel y Pelayo (gaiteru, caxa y otru gaiteru, respectivamente), collacios en Gaiteros del Carbón, tábemos tomando un café en Llaviana cuando ún de nós dixo, con chancia: «¿Y si facemos una charanga?».
Siguiendo cola broma, entamamos a pensar en collacios d’esti mundín que pudieran encaxar nesti formatu. Un día decidimos quedar para tocar toos xuntos nun ensayu improvisáu, na futura sede de Los Bribones, en La Pola Llaviana, y ver qué salía. N’acabando l’ensayu vimos que’l proyectu tenía futuru. Sonara bastante bien teniendo en cuenta que nunca tocáremos toos xuntos enantes. Aquel ensayu dio pasu a otru y, a la fin, decidimos dar el pasu de crear la formación de manera oficial.
La escoyeta del nome tamién tien la so historia. Durante los numberosos ensayos, que caltuvimos en secreto ensin publicar nada ni cuntar el proyectu, buscábemos un nome que fuera identificativu y fácil de recordar. Dempués de da-y muches vueltes, ún de los componentes comentó con chancia: «Total, si solo somos cuatro pelagatos». Aquella frase llamónos l’atención y, anque al principiu nun terminaba de convencenos, acabó convirtiéndose nel nome perfectu pal grupu.
En cuantes al motivu pol que surde una formación como esta, la nuestra idea yera crear un puntu d’alcuentru ente las bandines asturianes tradicionales y l’ambiente, la cercanía y l’animación qu’ufre una charanga. Queremos mantener un contactu directu col públicu y ufrir un repertoriu completu y versátil, capaz de facer disfrutar tanto a quien siente especial afinidá pola música tradicional y el folk como a quienes cenciellamente busquen pasalo bien nuna folixa, independientemente de la so edá.
«Nós quiximos apostar por un amiestu que recoyera la esencia d’una bandina tradicional —mesmo na instrumentación como en parte del repertoriu—, pero treslladando al escenariu la enerxía y l’ambiente d’una charanga. El nuestru oxetivu ye caltener una interacción constante col públicu, adaptándonos a cualquier formatu d’actuación»
Precisamente, tenéis una formación con una instrumentación distinta a la d’otres charangues y más cercana a la d’una bandina tradicional. ¿Cuánto hai de bandina y cuánto de charanga nel vuestru proyectu?
Anque n’Asturies ye habitual ver formaciones con gaites, nós quiximos apostar por un amiestu que recoyera la esencia d’una bandina tradicional —mesmo na instrumentación como en parte del repertoriu—, pero treslladando al escenariu la enerxía y l’ambiente d’una charanga. El nuestru oxetivu ye caltener una interacción constante col públicu, adaptándonos a cualquier formatu d’actuación: pasucáis, escenarios, actuaciones estátiques o cualesquier otru contestu. Buscamos conservar los nuesos raigaños tradicionales, pero cola cercanía, la espontaneidá y la capacidá d’animación propies d’una charanga.
¿Qué tipu de repertoriu trabayáis nes vuestres actuaciones?
Anque’l proyectu nació con un enfoque más tradicional, les actuaciones fixéronnos ver que la incorporación de cantares populares y actuales conectaba perbién col públicu. Por eso decidimos construyir un repertoriu pensáu pa tolos gustos. La mayoría de nós deprendimos a tocar con un repertoriu tradicional dafechu y nun queremos perder esa esencia. Siguimos interpretando muñeires, xotes, pasudobles y otres pieces tradicionales; pero tamién apostamos por crear mestures orixinales ente estos temes y cantares más actuales. Un exemplu ye una versión creada por nós mesmos na que xunimos la Rumba d’Ibias con ‘Caminando por la vida’, de Melendi.
Sicasí, siguimos calteniendo un importante pesu de la música tradicional dientro del nuesu repertoriu y queremos siguir venceyaos al mundu del folk, ufiertando propuestes amañoses pa tou tipu de públicos y eventos.
«Siguimos interpretando pieces tradicionales; pero tamién apostamos por crear mestures orixinales ente estos temes y cantares más actuales. Un exemplu ye una versión creada por nós mesmos na que xunimos la Rumba d’Ibias con ‘Caminando por la vida’, de Melendi»
¿Quién formáis Los Pelagatos y d’onde sois? ¿Participáis n’otros grupos y/o agrupaciones?
La formación ta compuesta por seis integrantes: Lola Bernardo (El Puente d’Arcu, Laviana), encargada del bombu. La so trayectoria musical con esti instrumentu entama precisamente en Los Pelagatos; Pelayo Noriega (La Rebollá, Laviana), gaiteru con llarga trayectoria en Gaiteros del Carbón dende los sos anicios qu’agora dedícase n’esclusiva a Los Pelagatos; Xuacu González (La Pola, Llaviana), gaiteru con anterior recorríu en Gaiteros del Carbón y qu’agora tamién forma parte de la Banda Gaites El Gumial; Moisés y Samuel Cuetos (La Felguera, Llangréu), gaiteru y caxa, dambos tienen una amplia trayectoria en Gaiteros del Carbón y tamién formen parte d’otres agrupaciones, como la Banda Gaites de Villaviciosa. Amás, tienen esperiencia como pareya de gaita y tambor y collaboren davezu con asociaciones, grupos de baille y otres formaciones; Daniela Rodríguez (Llaviana), l’acordionista. La so pasión por esti instrumentu vien-y de familia y deprendió a tocar de la mano de so madre, que foi la so mayestra.
La primer publicación que ficistis ye un videoclip con versión de ’20 de abril’ de Celtas Cortos. ¿Vais sacar más conteníos próximamente? ¿Dalgún rellacionáu cola música asturiana?
Tenemos munchos proyectos con vistes al futuru. La nuestra intención ye siguir publicando cantares nuevos, tanto temes tradicionales como versiones, y comprobar cómo les recibe’l públicu.
Amás, tamos preparando un formatu nuevu pensáu específicamente p’actuaciones enriba l’escenariu, nel que tengan espaciu temes pa cantar como y pa baillar. Queremos entemecer grandes clásicos de les fiestes populares con repertoriu tradicional, de manera que l’espectáculu resulte llamativu pa tou tipu de públicu. Pa esi proyectu tamién contemplamos ampliar la formación incorporando músicos nuevos, como un teclista o un cantante, y siguir evolucionando ensin perder la esencia que caracteriza a Los Pelagatos.
«Queremos entemecer grandes clásicos de les fiestes populares con repertoriu tradicional, de manera que l’espectáculu resulte llamativu pa tou tipu de públicu. Pa esi proyectu tamién contemplamos ampliar la formación incorporando músicos nuevos, como un teclista o un cantante»
Suscríbite a les nuestres novedaes
