LaGuinda vuelve a Asturies. Tres facer el pasáu añu la so primer xira na tierra de la so cabezalera, Ana Pereda, esti grupu astur-francés qu’entemez música asturiana con soníos llatinoamericanos y de la Islla de La Reunión torna pa dar cuatro conciertos en formatu tríu. Colunga, Llanes, L’Infiestu y Teberga son los llugares onde van actuar ente’l xueves 16 de xunetu y el domingu 26 de xunetu.
La xira entama esti xueves 16 en Colunga. El Parque Hernán Pérez-Cubillas va acoyer a les 20h l’actuación dientro del ciclu Musicalle qu’entama l’Ayuntamientu. El vienres 17 a les 20.30h LaGuinda aporten al Casinu de Llanes y yá pa la selmana siguiente, actúen el sábadu 25 en La Maléfica de L’Infiestu a les 21h y el domingu 26 nes Fiestes de Santiagu de Samartín, en Teberga. Toles actuaciones tienen entrada llibre.
«Esti formatu tríu de LaGuinda ye más intimista y nél damos muncha más importancia a les voces, a les armoníes vocales que son les que dan cuerpu al directu», desplica Ana Pereda sobre un formatu del qu’asegura disfrutar muncho pola so cercanía. La música avilesina va tocar l’acordión, charango, kayambe y cantar y, xunto a ella, van tar los músicos franceses César Nicolaïeff (contrabaxu y voz) y Emiliano Germain (batería y voz)
Suscríbite a les nuestres novedaes
