El grupu maliayu Melandru vuelve a los escenarios

Depués del parón obligatoriu pol andanciu del Covid-19 y dalgún cambiu na formación, la banda de Villaviciosa Melandru vuelve a xubir a un escenariu. Va ser el xueves 22, a partir de les 21:00 hores, na sala uviedina Lata de Zinc, con entrada a 6 € anticipada y 8 € na taquilla.

La banda presentaba’l so primer y únicu trabayu discográficu hasta la fecha nel añu 2018, con cinco temes de desarrollos llargos (sobrepasen los cinco minutos) y un soníu envolvente, delles veces raspiando lo escuro, onde prima lo instrumental, anque la voz tamién tien el so espaciu. Pente la so instrumentación destaca l’emplegu de la gaita tradicional, que-y aporta personalidá y un toque orixinal, más cuando apaez nun contestu ayenu dafechu a lo tradi. El resultáu final ye un ambiente sonoru averáu al llamáu post-rock, pero con delles testures acústiques qu’aporten el contrapuntu a los pasaxes más crudos; too ello apórta-yos singularidá dientro del rock fechu en llingua asturiana. Los propios componentes esplicaben la so filosofía con estes palabres: «Melandru fórmase col enfotu d’abrir una canal d’espresión alredor de la realidá social, política y cultural del nuestru tiempu. Podría dicise que ye un amiestu d’elementos qu’entemecen crítica al sistema nel que vivimos, tanto a nivel local como global, dando tamién llugar a les emociones más personales y sicolóxiques…» (declaraciones recoyíes del diariu dixital villaviciosahermosa.com).

Melandru van aprovechar el conciertu del xueves pa, amás de tocar los temes del so discu, presentar dellos temes nuevos. Nél van tar acompañaos pol dúu de stoner y fuzz/psych Yetii, provenientes de Manchester.

Discos de rock n’asturianu a la venta na tienda