Carlos Rubiera presenta con un conciertu coral «Lluna d’abril»

Esti xueves el músicu xixonés Carlos Rubiera va facer la presentación nel Teatru Filarmónica d’Uviéu, a partir de les 20:00 hores, con entrada llibre hasta completar aforu, de la obra titulada Lluna d’abril. Nel actu va actuar el Coru ‘Capilla Polifónica Ciudad de Oviedo’, acompañáu pola acordionista María Álvarez Santiago.

Esta obra ta publicada nun volume dientro de la colección Collecha Asoleyada (númberu 16) de l’Academia de la Llingua Asturiana y axunta doce pieces corales -toes elles n’asturianu- compuestes por Rubiera a lo llargo de los años. Delles son adaptaciones de temes grabaos anteriormente, como’l perconocíu «La Capitana» o «Virxe de Guía», pero la mayoría son pieces inédites qu’agora ven la lluz; ente elles destaca una adaptación llibre del Coru de los Esclavos Hebreos (el famosu Va pensiero) de la ópera Nabuconodosor, de Guiseppe Verdi. Nel repertoriu atropáu en Lluna d’abril hai pieces de calter estremáu, dende les relativamente cencielles, llamaes a convertise en populares, a otres de mayor complexidá. Nel volume, amás d’una introducción del autor, apaez la lletra y la partitura de les doce composiciones, coles indicaciones afechisques pa la so interpretación.

«Axunta doce pieces corales compuestes por Rubiera a lo llargo de los años»

Con esti trabayu Rubiera continúa la xera entamada con En clave de lluna (2019), una colección de pieces llíriques de grandes clásicos de la ópera y el lied adaptaes al asturianu. L’enfotu de la obra que va presentase’l xueves queda resumíu nestes palabres del so autor en Antoxana del llibru: «abúltame que n’Asturies nun andamos sobraos de repertoriu coral propiu; a pesar de ser la nuestra una comunidá con una llarga tradición d’agrupaciones corales populares y onde la xente yera (más de lo que ye) aficionao a cantar. Ye verdá qu’hai un repertoriu coral asturianu prestosu pa la xente y valoratible dende’l puntu de vista musical. Pero, too hai que dicilo, nel sen poéticu y llingüísticu, na música coral asturiana hai poco onde escoyer si se quier llevar pel mundu alantre con “arguyu de pais”».

Discos d’agrupaciones corales a la venta na tienda