Vuelven a Piloña les Xornaes del Vigulín

A lo llargo de tol fin de selmana van desenvolvese en L’Infiestu les II Xornaes del Vigulín Tradicional, un festival que tien como protagonista a esi instrumentu y qu’axunta bien d’actividaes alredor d’él.

Van inaugurase’l vienres 22 cola conferencia El vigulín nes investigaciones del ATOAM (Sala Polivalente, 17:00 h.), de Xosé Ambás y Ramsés Ilesies, a la que va siguir la II Xuntanza de Vigulineros Asturianos. El programa d’actividaes del sábadu 23 inclúi’l cursu El vigulín pal baille tradicional asturianu: Repertoriu y recursos estilísticos (Centru de Formación Profesional El Prial, 10:00 h.), impartíu por Dolfu R. Fernández, Rubén Bada y Santi Galguera; pa la reciella, el taller Restolando, de David Varela; y los conciertos de les formaciones folk Rodrigo Martínez Trio(Lleón) y Calea(Asturies), pa rematar con DJ Fañagüetana carpa del festival, asitiada na piscifactoría (21:00 h.). El domingu 24 va facese un Taller de Baille Tradicional (Piscifactoría, 12:00 h.), con Santi Galguera, y darréu un Vermú en Danza; pela tarde va desarrollase un cuentu musical -pa neños y neñes de 3 a 8 años- tituláu El vigulín de Ramonín (Piscifactoría, 17:30 h.).

Amás de too ello, el sábadu pela tarde una pareya tradicional de vigulín y bombu va percorrer les cais, el sábadu y el domingu pela mañana La Banda Latira van animar l’ambiente, a lo llargo de los tres díes va poder vese la esposición El vigulín tradicional nel conceyu de Piloña, y nun va faltar la gastronomía col Pinchu vigulineru que van ufiertar dellos establecimientos.

La organización quier reivindicar con estes xornaes «la tradición del vigulín nel conceyu como una seña d’identidá cultural única dientro’l panorama de la música asturiana, y depués del éxitu de la primer edición constátase que Piloña ye yá la capital del vigulín tradiciona n’Asturies». Na so programación participen delles asociaciones y colectivos tanto piloñeses como asturianos baxo la coordinación de l’Asociación LaKadarma y el Conceyu de Piloña.

Discos de música tradicional y folk a la venta na tienda

Dexa un comentariu

X