Ayeri aconceyó’l plenu de Conseyu de Patrimoniu Cultural d’Asturies, el máximu órganu asesor del gobiernu asturianu nesta materia. Nesta reunión, presidida pola conseyera de Cultura, Política Llingüística y Deporte, Vanessa Gutiérrez, el Conseyu informó favorablemente pa entamar los espedientes colos que declarar como Bien d’Interés Cultural (BIC) la Cultura Asturiana de la Gaita, a La Danza n’Asturies y a Les Mazcaraes d’Iviernu.
Con este pasi, la Conseyería va aprobar les resoluciones d’incoación, lo que supón l’aplicación provisional del réxime de protección propio de los bienes declaraos BIC, tal y como establez la Llei de Patrimoniu Cultural d’Asturies. Dende entós, los espedientes van continuar la so tramitación cola solicitú d’informes a instituciones consultives y l’apertura de los correspondientes periodos d’información pública y presentación d’alegaciones. Una vegada completáu’l procesu, les propuestes vuelven al Conseyu de Patrimoniu Cultural pa qu’emita un informe final enantes de llevalu al Conseyu de Gobiernu, encargáu d’aprobales defechu a traviés d’un decretu.
En cuantes a la Cultura Asturiana de la Gaita, el Conseyu alcordó iniciar l’espediente pa declarala BIC y reconocela como ún de los elementos más representativos de la identidá cultural d’Asturies. Amás reconoz non namás la interpretación y la so presencia n’ámbitos festivos, institucionales y sociales, sinón el conxuntu de práctiques que van acullá: la tresmisión de repertorios, la fabricación artesanal y la so continuidá que se caltién gracies a una comunidá activa d’intérpretes, constructores y agrupaciones.
En cuantes a La Danza n’Asturies, la incoación del espendiente BIC recueye que se trata d’un conxuntu diversu d’espresiones coreográfiques venceyaes a les celebraciones festives y rituales, con amplia implantación territorial y fuerte carga identitaria. L’espediente recueye tanto les dances con práctica continuada como aquelles recuperaes nes décades últimes.
La otra de les cuestiones más rellacionaes cola música tradicional asturiana aprobada ayeri nel plenu de Conseyu de Patrimoniu Cultural d’Asturies ye l’aniciu del espediente pa declarar tamién BIC a Les Mazcaraes d’iviernu -simbólicu nesti momentu, nel que ta celebrándose per primer vegada n’Asturies el XVIII Festival Internacional de la Mázcara Ibérica-. L’informe contempla qu’estes celebraciones, venceyaes col ciclu festivu d’iviernu, entemecen personaxes mazcaritaos, música, escenificación y ritualidá y que se trata de manifestaciones culturales complexes, enraigonaes na comunidá, que se caltuvieron vives gracies a la so tresmisión xeneracional. «La so protección pemitirá reforzar la so conservación», recueye’l gobiernu asturianu na nota prensa unviada pa informar sobre estos na protección de la cultura tradicional asturiana.
Suscríbite a les nuestres novedaes
