La música y el baille’l país va volver ocupar un llugar central nes fiestes d’El Bollu qu’organiza la Sociedad La Peruyal de Les Arriondes gracies al Festival Folclóricu de La Peruyal, qu’aporta esti añu a la so edición númberu 74. Esti domingu 26 de xunetu dende les nueve la mañana entamen les actividaes que van axuntar a más diez formaciones procedentes d‘Asturies, Castiella, Escocia y Irlanda.
La programación va entamar a les 09 hores cola tradicional Alborada Musical, na que delles les bandes y grupos participantes van percorrer les cais de la villa. A les 11h va celebrase la misa solemne n’honor a los socios finados, cantada pol Coru Mineru de Turón.
Al rematar la celebración relixosa, toles agrupaciones van desfilar hasta la Plaza Venancio Pando, onde va dar entamu’l LXXIV Festival Folclóricu de La Peruyal. Nesta edición van participar Les Ruxideres del Sueve (Parres), Banda de Gaites Picos de Europa (Cabrales), Banda de Gaites Los Tragos (Valladolid), Banda de Gaites El Gumial (Ayer), Los Yerbatos (Bimenes) y El Corriellu La Pandorga (Bimenes); amás de les formaciones internacionales Asociación Cultural Etnográfica La Arrancada (Zamora), la escocesa The Barrhead & District Pipe Band y la irlandesa Jordan Academy Irish Dance.
La tarde va tar marcada pol tradicional Gran Desfile de Carroces, previstu pa les 18h, que va percorrer les principales cais de Les Arriondes hasta’l parque de La Concordia acompañáu por bandes de gaites y encabezáu por Les Moces de La Peruyal. Llueu van desendolcase otres actividaes que completen estes fiestes d’El Bollu qu’arranquen esti miércoles 22 de xunetu y s’allarguen hasta’l llunes 27.
Suscríbite a les nuestres novedaes
