Les Arriondes vuelve a enllenase esti vienres 30 de mayu de baille y música tradicionales. La carpa afitada en parque La Llera de la capital del conceyu Parres acueye por segundu añu l’eventu La Peruyanza, entamada pola Sociedá La Peruyal, la mesma asociación que dende hai 75 años desendolca les Fiestes del Bollu de Les Arriondes cada caberu fin de selmana de xunetu.
L’eventu va entamar a les siete la tarde con un taller de baille asturianu que va dar Santi Galguera. Dempués, los y les vecines asistentes van iguar una espicha collaborativa pa llueu dar pasu a l’actuación del cuartetu de música tradicional 6 Riales. Tamién van xubir al escenariu Les Ruxideres del Sueve, agrupación llocal de pandereteres y, pa rematar l’eventu, va haber sesión de micro abiertu pa tolos músicos y músiques que querian participar.
Como novedá esti añu, La Peruyanza va cuntar cola participación d‘instrumentistes y danzantes qu’aporten dende Inzinzac-Lochrist, conceyu bretón hermanáu con Parres dende hai 25 años, y que tamién van deprender a danzar al xeitu bretón a los y les asistentes al eventu.
Suscríbite a les nuestres novedaes
