Dempués de la primer esperiencia celebrada l’añu pasáu, el Mediu Güeyu Festival de Villaviciosa vuelve a convocar el Concursu de Videoclips grabaos nel mediu rural. Hasta’l 7 d’ochobre pueden presentase propuestes que cumplan coles bases -un máximu de dos por participante- a traviés del corréu [email protected]. El videoclip ganador va recibir un premiu en metálicu de 500 euros, amás d’una escultura.
«Promover la realización de videoclips nel mediu rural y ayudar a dar a conocer proyectos audiovisuales nuevos» son dos de los oxetivos cimeros d’esti certame. Les bases recueyen que pue participar cualquier persona que tea desarrollando’l so llabor nel Estáu español nel ámbitu de la realización audiovisual y que los trabayos tienen que ser independientes, ello ye, «non vinculaos a productores o distribuidores grandes» y grabaos dende 2023 en cualquier espaciu del «mediu rural del territoriu español«.
En cuantes a la estaya técnica, los videos pueden tar grabaos con cualquier dispositivu (teléfonos móviles, cámares de cualquier tipu dixitales o analóxiques…) «non afectando a la puntuación los medios técnicos usaos». Amás pue usase cualquier técnica: «imáxenes de videu, fotografía, animación d’ilustración o collage, xeneración d’imáxenes con medios dixitales».
Dempués del plazu del 7 d’ochobre pa que se presenten videoclips, el xuráu va dar conocer el nome de los videoclips escoyíos el 21 d’esi mes. Los videos van proyectase na XIV edición del Mediu Güeyu festival y na gala del 24 d’ochobre va dase a conocer la pieza ganadora como Meyor Videoclip premiada con 500 euros y una escultura; amás de los accésit n’otres estayes –Meyor Canción, Meyor Montaxe, Meyor Vestuariu y Maquillaxe y Meyor Fotografía-, que tamién van llevar una escultura como reconocimientu.
Por último, la organización esclaria que «tamién pueden presentase videoclips qu’anque nun cumplan dalgún de los requisitos se consideren afayadizos pa proyectalos nel Festival. Nun van optar a los premios pero proyectaránse’l día de la Gala si’l Xuráu lo considera oportuno pol so interés». D’esta manera esti veteranu festival de cine nel mediu rural fai’l so apueste pola música y por venceyar estes dos disciplines artístiques.
Suscríbite a les nuestres novedaes
