La formación nueva hardcore, punk, rap y electrónica, PVXARRA, ta acabante d’asoleyar el so tercer trallazu: ‘SOI (NUN SOI)‘. «El tema trata de la masculinidá tóxica qu’heredamos de xeneración en xeneración», desplica Ferla Megía -productor de la formación- al rodiu d’esti cantar. A lo que-y añade: «nun ye’l nuestru casu, porque los nuestros pas son bona xente, el cantar va pa lo qu’hai per ehí«. El cenciellu nuevu d’esti grupu yá pue sentise en toles plataformes musicales y el so videoclip ta disponible en YouTube.
PVXARRA ye un tríu formáu pol mentáu Ferla Megía a la producción, Cosme a les lletres y voz y Argu al baxu. La so referencia son grupos como Death Grips, IDLES, Kneecap, Chill Mafia, Aphex Twin y soníos como’l punk, rock n’ast, hardcore o drum&bass; «coses que nos presten y que nos faen sacar la rabia de dientro», desplica Megía sobre esti grupu que naz de la so amistá colos otros dos componentes y de los descartes que l’artista multidisciplinar fixo pal so propiu proyectu: «dende va un par d’años tolo que producía pa Ferla que me paecía mui cañeru guardélo nuna carpeta cola intención de facer dalgo paecío notra formación».
‘SOI (NUN SOI)’ ye’l tercer single que llancen tres d’estrenase’l pasáu xunetu con ‘TIESLO TOU (NUN QUIES NA)‘ y publicar hai dos meses ‘FURACU (COMIÓME)‘, un contundente tema de hardcore electrónicu nel qu’andecha la formación crust Desaniciu.
Suscríbite a les nuestres novedaes
