Algaire entama una campaña de micromecenazgu pa financiar el so primer discu

‘Coral y Maera‘ va ser el primer discu del grupu folk Algaire. Pa poder financialu, la formación mierense acaba de llanzar una campaña de crowdfunding al traviés de Verkami que presenten asina:

«Algaire somos Carla Miranda, Iratxe Espina y Loreto Suárez (voz y percusión tradicional asturiana), y Juan Yagüe (guitarra). El nuestru oxetivu ye aportar una visión propia de la música tradicional asturiana dende una perspectiva actual y contemporánea.

El proyectu consiste na publicación del nuestru primer discu, que va llevar por títulu Coral y Maera. Tres d’un añu furrulando como grupu, y depués de que munchos de vosotros nos lo pidiereis nos nuestros conciertos, decidímonos a dar un pasu más nel nuestru camín y volcar el trabayu que ficimos tou esti tiempu nun discu.

Pa poder facer realidá esti proyectu, necesitamos del vuestru sofitu. Queremos que seyáis los nuestros mecenes y nos echéis un gabitu. Toa aportación ye perimportante y va dir destinada dafechu a la grabación, edición y producción del discu. Como nun podía ser d’otra forma, toles aportaciones van tener la so recompensa».

Comprar discos de pandereta na tienda online