El Pitafesta preestrena esti domingu la obra musico-lliteraria «A Lluz, Orión e a Nova Lluz»
Esti fin de selmana cellebrase en Bual el Pitafesta, un festival perinteresante qu’axunta música, poesía, teatru, cuntacuentos, danza, comida ecolóxico y munches más actividaes pa tola familia. La sostenibilidá y la defensa del mundu rural ye parte de la filosofía d’esti eventu que tien como particularidá el ser l’únicu festival que se fai nun gallineru. La música n’asturianu y gallego-asturiano va tar presente na programación coles actuaciones de Mapi Quintana (sábadu 3), Urso Dakoff (domingu 4) y el preestrenu de A Lluz, Orión e a Nova Lluz, el nuevu espectáculu de los hermanos Miguel y Andrés Rodríguez Monteavaro.
«A Lluz, Orión e a Nova Lluz ye’l proyectu de poesía, música y visuales que planteamos Andrés y yo pa finales de 2022 y sobre too 2023», comenta Miguel Rodríguez Monteavaro, responsable de la parte lliteraria de la obra. «Ye un proyectu en tres fases. La primera ye la lliteraria, que revisita’l mitu d’Orión, que ye un xigante clásicu griegu y tamién ye mio fíu; entós xuego coles dos coses y xuego como si Orión fuera’l prototipu d’home periféricu del sieglu XXI. Dempués tien la parte musical que ye sobre too gaita y música tradicional descompuesta y secuenciada electrónicamente, que lo fai Andrés; y falta la parte d’audiviosuales que ye na que nos vamos meter nesta seronda», desplica’l músicu y escritor.
Anque, como sorraya Monteavaro, l’espectáculu al completu nun va poder vese «hasta xineru de 2023» y el llibru que complementa a esta obra asoleyará «a mediaos o finales de 2023», esti domingu ye’l so preestrenu nel Pitafesta. A les 18h los hermanos Monteavaro van entrar nel gallineru de la Granja Pitasana pa presentar l’espectáculu «ensin la estaya d’audiovisuales porque ta en procesu de creación».
Residencia Literaria A Coruña 1863
A Lluz, Orión e a Nova Lluz nació gracies a la beca Asturies, ayuda de la Conseyería de Cultura, Política Llingüística y Turismu que sofita los gastos durante un mes pa desendolcar una residencia de creación lliteraria en llingua asturiana o n’eonaviegu na Residencia Literaria 1863 d’A Coruña, allugada nel llugar onde naciera la Real Academia Galega y a pocos pasos d’onde tamién vivieron Emilia Pardo Bazán, Rosalía de Castro o Pablo R. Picasso. Miguel Rodríguez Monteavaro ganó la primer convocatoria d’esta ayuda gracies, ente otres coses, al calter interdisciplinar d’esti proyectu.
«Na residencia d’A Coruña desdendolqué la parte lliteraria y ye una esperiencia bonísima que recomiendo a tol mundu. Hasta’l 15 de setiembre ta abierta la convocatoria pa la segunda residencia y animo a tolos escritores d’Asturies a que se presenten», opina Monteavaro. El tamién músicu de Caldo y Os Rabizos y Urso Dakoff comenta amás qu’estes iniciatives seríen «mui potentes pa obres musicales». «Hailo yá en munchos sitios. Por exemplu’l mio hermanu yá tuvo en dalguna residencia nel País Vascu y Madrid pa preparar coses d’él. Si Asturies se metiera nesto, sería xenial», remata’l responsable d’A Lluz, Orión e a Nova Lluz. Esti domingu nel Pitafesta va poder vese’l resultáu y próximamente en más escenarios per tol país.
