An Oriant, l’otru llau de la mesma mar

Musicasturiana.com nun pudo participar oficialmente na 51 edición del Festival Intercélticu de Lorient. Sicasí gracies a la collaboración de los llectores Lluques Díaz Rozada y Iyán Glez, y a que’l festival concedió-yos acreditación de prensa, ufrimos un siguimientu del eventu a traviés d’Instagram Stories. Amás d’esto, publicamos esta crónica con testu d’Iyán Glez. y semeyes de Lluques Díaz.

Cerca d’un millón de persones participaron del Festival Intercélticu de Lorient, el Tomorrowland del interceltismu, que pon nel centru les cultures y les músiques de raigañu de Bretaña, Irlanda, Escocia, País de Gales, Cornualles, Isla de Mann, Galicia y Asturies, siendo esta edición una mui especial pa nós, porque se dedicaba al nuesu país. Del 5 al 14 d’agostu, el muelle d’An Oriant convertíase nel epicentru d’un enfoque cultural y musical de representación y proyeición de lo nueso nun espaciu común como ye’l del Arcu Atlánticu. Pero, ¿qué oportunidaes pa un país como’l de nós ufre’l tar nesa Champions League que se celebra tolos branos na Bretaña?

L’añu d’Asturies

2022 foi la primer edición “normal” tres l’andanciu -que fixere que la edición de 2021 tuviere enllena de restricciones y na que nun hebo, por casu, carpes de referencia de cauna de les naciones celtes presentes nel FIL-. Con esi enfotu y gana per parte del públicu y, amás, col aquél de ser el primer añu tres de que l’asturianu Lisardo Lombardía dexare la so meritoria xestión como direutor del Festival, llegábemos a una edición que ponía a Asturies de protagonista no musical y no simbólico: cartelería, merchandising, banderes asturianes perdayuri, presencia de grupos y un espaciu propiu y central nel Cai de Lorient, la carpa d’Asturies, un puestu institucional de turismu y una barra averada a él. El buque insignia de la delegación asturiana foi, precisamente, esta carpa que, sicasí, xeneró crítiques pola so poca programación, tando valera munches hores acaldía. Les comparaciones son odioses: otres carpes, por casu la bretona y, especialmente, la que compartíen galeses y córnicos, emburriaben actuaciones y ambientación permanentemente. ¿La diferencia? L’apueste por elles que se fexo dende la hostelería de caún de los países: l’asturiana yera una carpa de financiación pública, institucional, mentanto que les otres -como la gallega, un sitiu nel que comer churrasco y pulpo con un pequeñu escenariu integráu nella- yeren negocios de restauración que contrataben les sos propies actuaciones más alló del cartel colos conciertos diarios del Festival. Con too y con ello, la falta d’hostelería asturiana que garrara una concesión nel FIL afita que fai falta munchu más trabayu de collaboración y concienciación dende les instituciones pa que n’Asturies se vea’l potencial de participar nun marcu de proyeición asturianu tan apavoriante como ye’l del interceltismu

«Fai falta munchu más trabayu de collaboración y concienciación dende les instituciones pa que n’Asturies se vea’l potencial de participar nun marcu de proyeición asturianu tan apavoriante como ye’l del interceltismu»

La representación institucional

Per primer vegada na hestoria, el gobiernu asturianu dio la cara n’An Oriant. Fexo dalgo cenciello y de coste baxu pero de fondu impautu simbólicu: unviar una delegación política al máximu nivel, col presidente del país -Adrián Barbón-, la Conseyera de Cultura -Berta Piñán- y el Director Xeneral de Cultura y Patrimoniu -Pablo Léon- y de Política Llingüística -Antón García-. Namás con averase unos díes al festival esto xeneró un efeutu rebote nos medios asturianos, que reflexaron la so visita, lo mesmo que nos de Bretaña. Nun foi la única comitiva institucional y política. Por casu, Aitor García -alcalde de Bimenes- y otros llíderes políticos, representantes culturales y sociales averáronse al Festival y afitaron enllaces de cooperación n’estremaos ámbitos que puen ser mui granibles p’Asturies no musical, no cultural, no etnográfico… pero tamién no económico y no político. Queda saber si, d’equí p’alantre, les instituciones van saber poner en valor la existencia d’esti ámbitu d’intercambiu nel qu’Asturies y Galicia tienen un papel cásique esclusivu na redolada territorial del estáu español o si vamos siguir centripetando haza les vieyes fórmules que prioricen el modelu FITUR y el centralismu cultural y musical nel qu’Asturies va siguir tando mui poco -o nada- valorada.

«Queda saber si les instituciones van saber poner en valor la existencia d’esti ámbitu d’intercambiu nel qu’Asturies y Galicia tienen un papel cásique esclusivu na redolada territorial del estáu español»

L’ambiente del Festival

El parque y el muelle d’An Oriant son un sitiu afayadizu pa qu’esporpollen estremaos ambientes nel contestu del FIL. D’una banda, ún siéntese dacuando nun mecigayu d’espaciu a mediu camín ente una suerte de “Semana Negra” -con caballitos, puestos de comida y bébora- y un Mercáu Astur con productos d’artesanía, comides tradicionales y xuegos populares. Too ello, metanes d’estremaos escenarios y ambientación que s’esparden per delles zones de la ciudá, especialmente na redolada de la Tavarn Ar Roue Morvan, un chigre icónicu que fadría naguar al públicu asturianu que para pelos pubs folkis d’Asturies.

El tipu d’asistentes camuda muncho dependiendo de la hora, pero pela nueche’l festival muda nun espaciu interxeneracional nel que la mocedá va de carpa en carpa entemeciendo les estétiques y escenes más folkis y traperes p’armar una folixa que, dacuando, sorprende a les propies bandes que tán actuando. Que-yos lo entruguen a Rubén Alba y Nel de Purnea, qu’habríen parar la so actuación cuando’l puxu de la mocedá tomaba l’escenariu pa llanzase dende ellí al públicu como si fuere un pogu de música punk. Al tiempu, nótase l’ambiente ente la población llocal, qu’identifica a la xente que visitamos la so ciudá como asturianes y asturianos ensin falta de desplicar aquello de “sí, bono, pero Asturies nun ye eso de sol, toros, flamenco y paella, ¿eh?”. Nesi sen, n’An Oriant lo asturiano xuega con muncho a favor d’antemano, lo qu’habría ser un estímulu p’afitar una rellación fondera nun mercáu propiu y ganáu pa la causa. ¿Nun habrá ponese en valor qu’Algaire, un grupu que ta ximielgando la escena musical asturiana con calidá, potencia ya innovación, ganare’l Troféu Loïc Raisson a la meyor banda frente a otros proyeutos musicales de tolos países convidaos?

«Ye un espaciu interxeneracional nel que la mocedá va de carpa en carpa entemeciendo les estétiques y escenes más folkis y traperes p’armar una folixa que sorprende a les propies bandes que tán actuando»

Música, cultura, economía, proyeición ya identidá

Nun fai falta tocar un instrumentu susceptible d’acabar formando parte d’una banda de música folk o celta, nin saber los bailles del país, pa decatase de la oportunidá que supón l’interceltismu p’Asturies. Si otros países nacieron nel Mediterráneu y xeneren los sos propios marcos de proyeición sociocultural, el nuesu tien nel Arcu Atlánticu’l so Nostrum Marem. Nun se trata de falar de la influencia de la comunicación histórica ente territorios a lo llargo la costa y la mar, de les asemeyances más o menos detectables, nin de si tal o cual instrumentu namás se toca neses 8 naciones celtes. Nun se trata d’afitar si lo asturiano s’asemeya más o menos a tal o cual cultura popular d’un territoriu más o menos averáu. L’ámbitu de lo intercéltico p’Asturies -más alló de lo que ye xera pa la hestoria, la etnografía y otres ciencies sociales- ye un espaciu de proyeición propiu ensin pasar pela validación política de Madrid, onde la lóxica de la cultura noroccidental de la península ye ayena.

Pudiere analizase qu’Asturies lleva intentando xugar na lliga del turismu de mases dende va décades; de vender que “tamién se pue dir a la playa y, dacuando -y cada vegada más-, fai sol”. Les élites polítiques y económiques del país lleven bien d’años mercando y reproduciendo los clichés d’una españolidá turístico-cultural que demanda la certificación central pa selo, igual que se fai a nivel políticu y económicu. Y sí: esta idea de lo que ye español ye un constructu artificial, un puntu de vista dafechu intencionáu y parcial, como pueda ser cualquier otru enfotu alternativu que se pudiere contraponer. Pero énte estos análisis, lo que pasa en Bretaña na primer quincena de tolos agostos ufre una visión alternativa pa la rellación económica, política ya incluso turística d’Asturies con otros territorios atlánticos na que les exes centrales son otres: el respetu pol entornu, la cultura compartida, l’abrazu ente tierres llonxanes venceyaes pola mesma mar, la defensa de les formes de vida tradicionales…

«Les exes centrales son otres: el respetu pol entornu, la cultura compartida, l’abrazu ente tierres llonxanes venceyaes pola mesma mar, la defensa de les formes de vida tradicionales…»

L’interceltismu pue ser un marcu de posibilidaes importante pa la proyeición internacional a lo llargo de tol contiente y una oportunidá única pa caltener la cultura, música y munches estayes de la economía y derechos sociales d’Asturies. Na población asturiana -y, seique, gallega- esti marcu atlánticu común ye un puntu de vista que ta bastante más afitáu socialmente de lo que, m’abulta, piensa en munches ocasiones el texíu cultural y políticu asturianu. 

Namás falta que sigamos remando pa da-y bon puertu a esta propuesta que tanto costó algamar…porque l’aire yá lu tenemos de popa.

Discos de música asturiana celta y folk a la venta na tienda