La conceyala d’Izquierda Xunida-Mas País-IAS nel Ayuntamientu de Xixón, Noelia Ordieres, va llevar esti miércoles al plenu del ayuntamientu de Xixón una proposición pa crear una escuela de música tradicional de titularidá municipal. Pa ello propón cuatro puntos d’alcuerdu: que la escuela tenga «un proyectu pedagóxicu que contemple itinerarios formativos, básicos, medios y avanzaos», «entamar los trámites necesarios pa la ellaboración del proyectu técnicu y presupuestariu, contemplando la so viabilidá económica», «coordinase col Gobiernu del Principáu d’Asturies pa aportar a les subvenciones y recursos autonómicos» y «impulsar la collaboración con asociaciones y entidaes privaes pa formar una ufierta educativa complementaria y reforzar la divulgación de la música tradicional».
«Xixón, como ciudá más poblada d´Asturies, nun dispón d’un centru públicu específicu qu’articule de manera profesional y estable la enseñanza de la música tradicional asturiana. Esta situación contrasta col modelu yá implementáu n’otres ciudaes como Vitoria-Gasteiz (Musiketxea), Vigo (E-Trad), o Uviéu (Escuela Municipal de Música Tradicional «Manolo Quirós»), onde instituciones específiques demostraron ser eficaces pa la preservación, tresmisión y evolución del so patrimoniu cultural«, argumenta Ordieres na so proposición, polo que plantega que «ye necesario que’l Conceyu de Xixón asuma la so responsabilidá na promoción d’esti patrimoniu, complementando’l llabor de les asociaciones y entidaes privaes creando una Escuela de Música Tradicional Municipal, garantizando una formación accesible, profesionalizada y pedagóxicamente ordenada pa tola ciudadanía».
En rueda de prensa, la conceyala d’IX-Más País-IAS sorrayó que «sobra decir que la música tradicional forma parte del patrimoniu inmaterial asturianu, que ye un elementu qu’hai que protexer, que ye necesariu qu’haiga polítiques públiques y s’apueste dende lo público pa dar el prestixu a esti patrimoniu». Nesti sen, defendió la so «promoción y espardimientu» y tamién «dignificar a la xente que se dedica de manera profesional a esti ámbitu». Tamién fizo un llamamientu al restu la corporación municipal -y especialmente a los partíos del gobiernu-: «recoyer esti tipu de patrimoniu daría muncho más prestixu a esa vía cultural xixonesa que tán poniendo en marcha con esti tipu de polítiques o de proyectos qu’anuncien cuasi a dario».
Reconocimientu a les asociaciones
«Debemos-yos a les asociaciones que se caltenga esti patrimoniu, porque son les que tán apostando por ello de manera decida durante años», reconoció Noelia Ordieres na so intervención, llamando tamién a collaborar con elles y con otres entidaes privaes. «Si agora s’abren una serie d‘espacios con milenta metros cuadraos, dalgún podrá haber pa que se cree una Escuela de Música Tradicional», concluyó la conceyala d’IX nesta rueda de prensa enantes de que’l miércoles se debata la propuesta en plenu.
Suscríbite a les nuestres novedaes
