Va unes selmanes la plataforma televisiva Movistar Plus+ estrenó la serie creada por Rodrigo Sorogoyen, Sara Cano y Paula Fabra Los años nuevos. La obra ta siendo tou un éxitu de públicu y crítica y nella suenen dos artistes venceyaos a la música n’asturianu: Nacho Vegas y Rodrigo Cuevas. El cantautor xixonés ye autor de la Banda Sonora Orixinal colos cantares «Los años nuevos» -del que güei s’estrenó’l videoclip– y «La noche es vieja», y tamién suena nel primer capítulu «La gran broma final«. Per otru llau, la música del axitador folclóricu siéntese nel capítulu 9 nel tema «El día que nací yo» del discu Manual de Cortejo.
L’apaición d’estos dos artistes comprometíos cola llingua asturiana nun ta llendada namás a los cantares, sinón que na serie protagonizada por Iria del Río y Francesco Carril fáise mención esplícita a cuestiones como que Rodrigo Cuevas algamó’l Premio Nacional de Músicas Actuales; los personaxes reconocen lo que-yos presta la música d’estos artistes; y tamién apaez un póster de cola portada del discu Violética de Nacho Vegas.
Nun ye la primer vez qu’una plataforma audiovisual de streaming escueye música d’artistes venceyaos a la música asturiana. Va dos años Netflix produxo la serie Las de la última fila, na que suena’l cantar «Titubeas» de Pauline en la Playa -formación d’Alicia Álvarez y de Mar Álvarez de Pop Piquiñín-. Estos fechos amuesen el potencial que tien la industria audiovisual pa puxar pola música dende una perspectiva cultural, promocional y económica.
Suscríbite a les nuestres novedaes
