Yá pue sentise y mercase en bandcamp Un requexu, el cuartu trabayu discográficu de Vixil, proyectu technopop del músicu Luis Sánchez. Na so obra nueva hai un total de diez pieces: cinco temes con voz y otros cinco instrumentales que faen d’introducción a caún d’esos cantares. Nellos suena pop electrónicu, ambient y unes lletres basaes n’obres lliteraries y n’otres situaciones imaxinares. La publicación del discu ta acompañada del videoclip de ‘Ye máxico‘, pieza que resume lo que’l músicu recueye nesta entrega.
«Los temes cantaos tienen un estilu de pop electrónicu con formatu mui definíu de cantar pop; mentanto que nes instrumentales hai espaciu pa momentos más ambientales y pa xugar en dellos casos colos samples o’l ruíu. Amás, atrévome a volver cola guitarra, yá non namás pa meter arreglos o dibuxos puntuales, sinón tamién pa meter pistes enteres con acordes que guíen un par de cantares», desplica Sánchez sobre les pieces d’un trabayu qu’afirma que ye nel que «más claramente se ve» la presencia del soníu technopop.
Otra de les novedaes ye la producción, porque toles voces y guitarres tán grabaes y producíes por Elisa Gómez, ex componente del grupu xixonés Viuda: «Ye la primer vegada que, como Vixil, daquién se encarga d’eso», desplica Luis Sánchez. «Tamién hai un cambiu na manera d’enfocar les lletres, sacando idees de llibros (La Bruja, de Michelet pa ‘Oh, Sol’) o imaxinando situaciones diferentes a les que tuviera en mente otres vegaes, como los esclavos faciéndo-y un regalu cumpleaños a la so ama en ‘Esclavos’, o la casa encantada de ‘Ye máxico'».
«‘Ye máxico‘ paecióme’l meyor exemplu p’amosar lo que quería d’esti discu. Estrofa-estribillu y cenciellez na estructura, intentando facer una melodía pegadiza«, comenta Luis Sánchez sobre la pieza escoyida pa grabar el videoclip qu’asoleyó xunto al llanzamientu. Amás, el cantante y productor quier actuar en directo con Vixil: «Intentaré moveme un poco d’equí a unos meses cola intención de que nel branu pueda tocar en dellos sitios. Va llevame un tiempu preparalo too pal directu, pero voi con ganes pa poder tener unes cuantes feches«.
Col llanzamientu d’esti trabayu Vixil amplía una discografía qu’entamó en 2020 con Llévame xera, continuó en 2023 con Adulces y siguió a finales de 2024 con S.E.C.R.A. Un requexu supón un pasu más p’afitar un soníu de pop electrónicu n’asturianu, faciendo de Vixil una propuesta única na escena y faciendo que medren los nomes d’artistes que trabayen cola música electrónica y la llingua asturiana dende óptiques estremaes.
Suscríbite a les nuestres novedaes
