Esti fin de selmana celébrase en Rozaes (Villaviciosa) la XIV edición del Mediu Güeyu festival y, dientro d’esti eventu, tien llugar el II Concursu de Videoclips Grabaos nel Mediu Rural. La organización yá anunció los trece videoclips finalistes, ente los que s’alcuentren trés d’artistes de la música n’asturianu: ‘Ónde ta mino’ de Vixil; ‘Les sueltes’ de Nun Tamos Toes, dirixíu por Anna Back; y ‘Lluminaria’ de La Ciudá nel Mar, dirixíu por Raúl Alonso.
Esti vienres 24 d’ochobre’l festival audiovisual arranca cola proyección de los videoclips finalistes y a les 21h celébrase la II Gran Gala Concursu Videoclips Mediu Güeyu. Azaila F. Torreiro y Janire Mañes van presentar esta gala na que va dase a conocer la pieza ganadora como Meyor Videoclip, premiada con 500 euros y una escultura; amás de los accésit n’otres estayes –Meyor Canción, Meyor Montaxe, Meyor Vestuariu y Maquillaxe y Meyor Fotografía-, que tamién van llevar una escultura como reconocimientu. Tamién un premiu del públicu, pero pa ser miembru del xuráu popular, hai que tar en Rozaes a les 19h pa poder facer el visionáu de toles obres.
«Promover la realización de videoclips nel mediu rural y ayudar a dar a conocer proyectos audiovisuales nuevos» son dos de los oxetivos cimeros d’esti certame enmarcáu dientro de Mediu Güeyu. Les bases recueyen que pue participar cualquier persona que tea desarrollando’l so llabor nel Estáu español nel ámbitu de la realización audiovisual y que los trabayos tienen que ser independientes, ello ye, «non vinculaos a productores o distribuidores grandes» y grabaos dende 2023 en cualquier espaciu del «mediu rural del territoriu español«.
Suscríbite a les nuestres novedaes
