El proyectu d’electrónica de raigañu L.lercia, asoleya’l so primer EP

Yá ta en toles plataformes dixitales ‘Queimada‘, el primer EP de L.lercia. Tres d’asoleyar en 2021 el single “Ximiélguense” -que tenía como base una grabación fecha por Alan Lomax en 1952 en Cabrales-, y una reinterpretación del “Corri Corri“, esti proyectu d’electrónica asturiana publica esti llanzamientu formáu por dos pieces instrumentales: “Queimada” y “AndrOFF”.

«”Queimada” ye una versión de la típica “Danza Queimada“, que nesti casu amás de tener una base rítmica fecha con sintetizadores y samples distorsionaos, tamién cunta con grabaciones de flautes y whistles propios», comenta Lucía Garó, fotógrafa avilesina de venti años que s’alcuentra detrás de L.lercia. “AndrOFF” preséntalo como «una versión más ambiental d’un “An Dro”,  una danza bretona d’orixen celta, con un instrumental que tien un entamu más tétricu, porque la Llercia tamién ye un ser que asusta a los neños».

La publicación d’esti EP marca un pasu más nesti nuevu proyectu musical, que como comenta Garó, nació «nuna tarde d’aburrimientu na cuarentena». «Taba xugando col Garage Band faciendo pieces de house (otru de los mios xéneros favoritos) y vínome a la cabeza la idea d’insertar una grabación recopilada por Alan Lomax. El resultáu prestóme bastante y a partir d’ehí entamé a mezclar cosuques tradicionales con bases ellectróniques, hiphop y otros ritmos más traperos»., desplica.

Más canciones y conciertos

«El nome del proyectu surdió por esi “mieu” a publicar un estilu que nun-y gustare a naide o que nun fuere aceptáu», matiza l’alter ego de L.lercia. Sicasí, Lucía Garó afirma qu’hai intención de tirar palantre: «tengo en mente publicar toles canciones que tengo almacenaes y les que tan tovía pendientes de meyorar cosines». En rellación a si va presentar la so música en directo, comenta qu’anguaño nun se lo plantea, anque esclaria que «cuando’l proyectu tenga más visibilidá… quien sabe».

Con L.lercia y ‘Queimada’, la electrónica de raigañu sigue medrando n’Asturies. Nomes veteranos como’l de Fruela 757, axúntense a otros nuevos como Llevólu’l Sumiciu, A Fesoria, Bimenes Underprau y L.lercia, pa reflexar qu’hai interés y trabayu dientro d’esta escena.

Mercar discos con electrónica y música urbana na tienda online