Yá ta a la venta en musicasturiana.com ‘Sirio’ de Fontoria
-
FONTORIA – 2CD ‘Sirio’20,00€
El pasáu 1 de febreru asoleyó ‘Sirio‘. el tecer trabayu discográficu de Fontoria. La banda piloñesa de folk progresivu escosó toles copies en namás dos díes, pero en musicasturiana.com hai dos unidaes a la venta que yá se pueden mercar na tienda online dende cualquier país del mundu.
‘Sirio’ ye un ambiciosu doble CD. El discu A -que pue sentise en plataformes dixitales– ta formáu por una única pieza instrumental de 74 minutos na que Fontoria xuega a esperimentar cola música de raigañu pa crear «una mecigaya de soníos que van dende los sones tradicionales de dellos llugares del mundu, a los ritmos electrónicos, la lírica, el rock progresivu o la música de cámara». como comenta Maxi Areñes, cabezaleru de la formación.
El discu B que completa la edición física de ‘Sirio’ «tien una duración de 50 minutos y ta enllenu de pieces d’orixe tradicional qu’aporten de llugares como Asturies, Bretaña, Escocia y, en xeneral, tol Arcu Atlánticu». Nél, tamién hai temes de composición propia, anque marcaes por tener «un calter tradicional», como sorraya’l músicu del grupu de folk progresivu.
La presentación en directo d’esti álbum que se caracteriza tamién por tener numberoses collaboraciones -la soprano Susana Gudin (Taranus), el multiinstrumentista Pablo Canalís, los flautistes David Fernández y Iván Emo y el baterista Xosé Ánxel Allende-, va ser el próximu 16 d’abril en la Casa La Cultura de L’Infiestu, a les 19.30h.
Documental y cuartu discu
«Vamos facer un documental alrodiu la banda, cola música de ‘Sirio’, que sacaremos esti añu tamién, anque nun sabemos si incluyilo nel que sedrá’l cuartu discu -nel que yá tamos trabayando- y que va nomase ‘Goetia‘», esclaria’l músicu de Piloña sobre los próximos de Fontoria, banda que dende que se formó na primavera de 2017, nun apara. En 2019 debutaron con ‘Nordés’ -nomináu a los AMAS na estaya de “Mejor Canción Folk”- y en 2020 llanzaron ‘El máxicu viaxe de Fionna de Morlay’, tamién nomináu nos AMAS, anque esta vegada na categoría de ‘Mejor Disco Folk’. Col doble álbum ‘Sirio’ avancen nel so camín.
