El rock n’asturianu protagoniza’l VIII Maízu Rock

Esti fin de selmana vuelve a Intriago (Cangues d’Onís) el Maízu Rock, una de les cites imprescindibles pa los siguidores del rock y el punk. La octava edición d’esti festival que lleva faciéndose dende’l 2006 destaca por tener de cabezaleros de cartelu a tres grupos de la escena rock n’asturianu: Skontra, La Tarrancha y Misiva. Amás, van actuar otra montonera formaciones de grupos d’ámbitu estatal o que, siendo d’Asturies, canten n’otres llingües que nun seyan l’autóctones.

El Maízu Rock ye esti vienres 1 dende les 22h y sábadu 2 de xunetu dende les 20h, siendo les actuaciones de los grupos de rock n’asturianu el día 2. Skontra van aprovechar pa presentar a la so nueva formación y continuar la xira del 20 aniversariu -que los lleva un día enantes al prestixosu Resurrection Fest-; La Tarrancha continúan presentando’l so nuevu cantar “Tiempu de sidra y roses” amás de facer un respasu per tola so discografía; y Misiva tamién continúen con esti conciertu les actuaciones de celebración del so X+2 aniversariu y presentación del so cantar nuevu “La Misiva“.

Mercar discos de los grupos participantes