El documentu audiovisual El sonido de un pueblo: pasado presente y futuro del espíritu Unirock, realizáu por Belén Lobeto, va estrenase’l sábadu 24 de xineru, a les 19.00 hores, na Casa de Cultura de Veiga. La proyección va ser d’entrada gratuita, con inscripción previa hasta completar aforu, y forma parte d’una iniciativa destinada a recuperar y divulgar la memoria musical y cultural venceyada al movimientu Unirock n’Asturies.
L’actividá foi anunciada apocayá al traviés de redes sociales polos organizadores, que destaquen el calter colectivu y participativu del proyectu. Tres la proyección del documental, va ofrecese un vinu español na Aduana de Veiga, como espaciu de convivencia ente públicu, participantes y persones venceyaes al movimientu musical retratáu na obra.
El documental realiza un percorríu pelos cuarenta años de trayeutoria del espíritu Unirock, analizando la so evolución dende los primeros años hasta la situación actual. A lo llargo del metraxe, abórdense distintes etapes del movimientu, el so impactu na escena musical asturiana y el papel que desempeñó como plataforma pa grupos y artistes fuera de los circuitos comerciales tradicionales.
La obra recueye testimonios de protagonistes directos, material d’archivu y reflexones sobre la importancia d’estos espacios autoxestionaos pa la creación musical, la socialización cultural y la consolidación d’una escena alternativa n’Asturies. Dende la organización destácase que l’oxetivu principal ye documentar y contextualizar un fenómenu cultural que tuvo una influencia significativa nel desarrollu musical del país.
La música n’asturianu tuvo un papel destacáu y constante dientro del espíritu Unirock, funcionando como un elementu d’identificación cultural y como ferramienta d’espresión social. Dende los sos primeros años, los escenarios venceyaos a esti movimientu dieron cabida a bandes que fixeron del idioma propiu una parte esencial de la so propuesta artística, contribuyendo a la normalización del so usu nel ámbitu de la música popular contemporánea.
Dixebra representa unu de los referentes fundamentales nesti procesu. Activa dende finales de los años ochenta, la banda apostó dende l’entamu por cantar n’asturianu, integrando’l idioma nel rock combativu y nel discursu reivindicativu. La so presencia habitual en cartelos de conciertos y festivales vinculaos al circuitu alternativu consolidó un modelu que demostró que l’asturianu yera perfectamente compatible con soníos urbanos y mensaxes de calter social. La postrer vez que Dixebra tuvo nel Unirock foi nel añu 2024. Xunto a ellos, La Tarrancha aportó una visión más próxima al mezigayu ska y a la tradición musical asturiana. La banda figuró nel cartelu del festival nel añu 2023.
Otros grupos como Misiva, Mala Reputación y Desakato, llevaron l’asturianu a terrenos venceyaos al punk-rock y al rock estatal y pasaron tamién per esta cita del occidente asturianu. Desakato, unu de los grupos de mayor proyección estatal surdíos n’Asturies nos últimos años actuó nel añu 2014, mientres que Misiva toco esi mesmu añu y en 2018.
Suscríbite a les nuestres novedaes
