La XIV edición del Concursu de Canción Asturiana Conceyu de Siero llega esti domingu a la so cuarta eliminatoria. Once cantadores van competir a les 11.30h nel Auditoriu CPI Llugones por algamar el so pasu a les semifinales nún de los eventos institucionales más veteranos dedicaos a l’asturianada qu’entama AFATRA (Asociación de Folclore Amigos de la Tradición) col sofitu del Ayuntamientu de Siero. La xornada d’esti fin de selmana va tar amás dedicada al cantador Narciso Llera.
Narciso Llera Rodríguez (Ponga, 1935) entamó la so carrera tarde, nel añu 2006, animáu por Narciso Fernández (figura clave pa entender el desarrollu de l’asturianada del oriente asturianu) y el so fíu Óscar, quienes dempués de velu cantar nunes fiestes de Casu, animáronlu a siguir xubiendo a escenarios. El concursu d’Amieva foi la toma de contactu y motivación pa siguir madurando la so voz que percorrería llueu otros conceyos, algamando los primeros puestos nel Concursu de Santa Marina (Mieres del Camín) o nel d’El Comercio (Xixón) na modalidá d’aficionaos.
«A los sos 91 años Narciso tovía conserva la pasión y la enerxía na voz. Una voz madura y firme capaz de sostener la esixencia de l’asturianada con fuercia», despliquen dende AFATRA, añadiendo qu’esti cantador «quiciabes nun ocupa’l llugar acutáu pa les voces más célebres nin pa los intérpretes con más reconocimientu. Por embargu, la so figura ye clave pa entender lo que significa la tradición oral; la que nun se caltién namás polos grandes escenarios sinón que vive y perdura gracies a persones como él, que la cuiden, la tresmiten y la defienden con humildá y enfotu». Asina ye como esti certame «na figura de Narciso Llera quier rendir tan merecíu homenaxe a toes eses voces que formen parte de la tradición, que participen nos concursos y gracies a les cuales sostenemos el nuesu patrimoniu cultural».
Na cuarta xornada d’esti certame van participar un total d’once persones: Ángel Fernández Morán (Ayer), Fernando Fernández Arduengo (Ponga), Manuel López Menéndez (Cangas del Narcea), María del Carmen Fernández Álvarez (Cangas del Narcea), Raúl Díaz García (Piloña), Carlos Velasco Montes (Bimenes), Claudia Abad Bertólez (Llanes), María Luisa Martínez Suárez (Xixón), Esteban Verdeja Menéndez (Cantabria), Lorena Corripio López (Colunga) y Lucía Fernández Flórez (Xixón) na categoría moza. Amás, Ángel Fernández Morán participa tamién na modalidá de canción ayerana.
El gaiteru oficial ye Valentín Fuente y la presentadora ye Esther Fonseca. La convocatoria d’esti añu caltién les categoríes absolutes masculina y femenina, amás de la categoría moza (hasta 22 años), y contempla premios especiales en canción vaqueira, dialogada y ayerana, trés estilos fundamentales del repertoriu tradicional asturianu. El certame va celébrase hasta’l 19 d’abril tolos domingos a les 11.30h nel Auditoriu CPI Llugones y nel Teatru Auditoriu de La Pola. El 10 de mayu va ser la gala de premios d’un concursu que ye clasificatoriu pal Premiu Nacional Obdulia Álvarez «La Busdonga» d’Asturianada.
Suscríbite a les nuestres novedaes
