TPA sigue emitiendo tolos domingos a les 21.45 Xuntanza, el programa dedicáu a «celebrar la música al traviés de quienes la viven, la reinventen y la tresmiten». Nel capítulu d’esti 22 de febreru van actuar Bacotexo, la formación de rock en gallego-asturiano qu’asoleyó hai trés meses el so discu nuevu Hai úa lluz que sempre acaba salindo.
Nel so quintu trabayu esta formación tapiega presenta «nove cancióis que, inda dentro del estilo del rock, móvense en rexistros que poden suar ben diferentes: dende el rock clásico hasta el pop-funk, dende el grunge hasta as estructuras más complexas«, como desplica’l baxista Ricardo Saavedra. Too ello con un puntu d’alcuentru «todas as lletras xiran en torno a os cambeos vitales y fainlo con úa mezcra de señardá y de vitalismo».
Bacotexo ye un grupu de rock formáu en 2007 en Tapia. Les sos señes d’identidá más representatives son les de cantar n’eonaviego -porque ye l’únicu grupu de rock que lo fai actualmente nesta llingua– y el facer un rock clásicu influyíu por bandes anglosaxones como Queen, Led Zeppelin o Muse. Tienen cinco discos publicaos y los anteriores, Mar y A Guerra dos Mundos, son de calter conceptual. Nellos rescampla la calidá d’unes lletres que ponen en valor a la lliteratura en gallego-asturiano, con testos d’escritores como María José Fraga o Ricardo Saavedra, el baxista del grupu. Recibieron delles nominaciones a los AMAS y al Premiu al Meyor Cantar.
Suscríbite a les nuestres novedaes
