La Banda Sonora de Dani Álvarez

Dani Álvarez Mora ye ún de los músicos que más escenarios y estudios de grabación tien pisaos de toa Asturies. Lleva tocando la gaita dende los siete años y na so trayectoria qu’acumula yá tres décades n’activo tien collaborao en más de 50 trabayos discográficos, amás de tocao con una montonera bandes. Un currículum estensu pa dalguien que nun para y que lo mesmo toca una gaita, qu’una xiblata, un bouzuqui, una guitarra o lo que se-y ponga per delantre.

Con él siguimos cola estaya “La Banda Sonora De…“, una serie d’entrevistes de personalidá acompañaes d’una playlist de Spotify na que cada persona entrevistada escueye los 20 cantares que más-y presten.

Sienti la playlist La Banda Sonora de Dani Álvarez

Un discu qu’enxamás canses de sentir.

Hai munchos, sobre too de la música fecha n’Asturies, pero’l que más vueltes dio nel discman a lo llargo los años, foi Yá! de Felpeyu. A La Bandina’l Tombo tamién la fixi trabayar bien d’ello.

Si tuvieres que formar parte d’otru proyectu musical, ¿cuál sería?

Creo que soi afortunáu en poder xubir a los escenarios con media Asturies. Ensin dulda creo que’l proyeutu musical ideal ta en camín y ye una banda propia, cola que defender un discu enllenu d’ilusión y munchu trabayu detrás.

De los cantares que compusisti o interpretes, ¿cuál ye’l to preferíu?

La mio primer composición, de titulu “El Pericoito”. Los detalles, nel llibretu del futuru discu (rises).

«El proyeutu musical ideal ta en camín y ye una banda propia, cola que defender un discu enllenu d’ilusión y munchu trabayu detrás»

¿Cuándo foi la primer vez que xubisti a un escenariu y que pasó enantes, durante y depués?

Nel añu 92, nel “práu del molineru” nel mio pueblu, Sta Cruz de Mieres. “Actuación del niño Daniel” ponía’l cartafueyu de les fiestes de la Cruz de mayu y yera la chancia ente collacios llueu (rises). Enantes, Munchos nervios, durante, incertidumbre y dempués, satisfacción.

¿Qué ye lo más inxusto de ser artista?

Que nun camude la céllebre entruga na mentalidá arcáica de los que te suelten eso de:

– “¿pero d’esto pue vivise?”.

– Non señores, nun se pue vivir mentanto penséis asina tanto vosotros, como los que faen que gobiernen.

Ensin cultura, la vida sería aburridísima pero, somos unos titiriteros ho…..

Si fueres Conseyeru de Cultura, ¿qué son les primeres coses que fadríes?

Facer tolo posible por crear un bon circuitu de conciertos, festivales y eventos culturales como se manexen envidiablemente n’otros países y sobremanera, meyorar les condiciones de trabayu del artista dende que sal pola puerta casa hasta que torna. Por nun falar del pufu d’autónomos al que dalgunos tamos sometíos.

Gustaríame qu’esistiera dalgún día un Conservatoriu específicu de música tradicional. Tuvi la oportunidá de finar esti cursu pasáu el grau profesional pola especialidá de gaita y creo que ye l’instrumentu por excelencia y por ello tien el pesu y el llugar que merez, pero, como multiinstrumentista si se me pue considerar asina, tamién pienso nos demás instrumentos que la acompañen y que merecen el so sitiu y la so formación reglada. Más allá de facer un combu ente la música clásica y la tradicional, pienso qu’hai que separtalo. Ye una cuestión de conceptos.

La política de los programes musicales de la TPA, tamién fadría por da-yos una vueltina de tuerca.

«Vamos dicir en voz alta que me gusta dalguna sevillana. “Cántame” de María del Monte ye un temón y podría tocala tranquilamente colos mios instrumentos»

Enantes de ser artista de la música asturiana, de xuru que sentisti o visti en directo a más compañeros y compañeres d’esta escena. ¿Quién te marcó y t’animó a xubir al barcu de facer música n’asturianu?

En realidá yá taba dientro d’ella cuando vi los primeros conciertos. A mui temprana edá yá caleyábamos coles bandes de gaites. Cuando entamó’l Festival de Bandes de Gaites “Villa de Candás” hacia l’añu 97, los primeros grupos que vi en direutu naquella Plaza de La Baragaña foron, Felpeyu, Llan de Cubel y Dixebra colos mios pás. Pémeque son los trés másimos esponentes de la música asturiana y de les nueches folk d’antañu. Esi mesmu añu si mal nun recuerdo, presentaba’l mio mayestru José Ángel Hevia el primer prototipu de gaita MIDI. Probela y pesaba una tonelá. Tenía un rack pal módulo de soníos más grande que yo cuasi (nun yera cosa dificil tampocu) y acompañábase d’una pedalera con unos samples de bouzouki grabaos por Elías García y un bodhran tocáu por ún de los collacios de la Banda La Villa, Cristóbal García. Too aquello quedóme marcao pa espertar la inquietú poles tables d’ún escenariu.

Yá conocemos les tos recomendaciones y influencies… agora toca que te confieses: ¿cuál ye esi cantar o esi grupu qu’escuches culposamente “na intimidá”?

Soi de garrar la gaita y de comedia tocar tolos clásicos populares qu’haiga de series, debuxos animaos, anuncios publicitarios y demás, y más que culposo, paezme enriquecedor porque ye parte de la hestoria, pero tá claro que la sangre del segundu apellíu tira y vamos dicir en voz alta que me gusta dalguna sevillana. “Cántame” de María del Monte ye un temón y podría tocala tranquilamente colos mios instrumentos. Tamién un personaxe entrañable de Xixón que me gusta sentir dacuando, ye Goyo Ramos. Fui a velu al Savoy fai años.

¿A qué personaxe públicu convidaríes a un conciertu tuyu, a pasar llueu pel backstage y pa qué?

A cualesquier políticu pa que vea lo que ye l’oficiu de llegar, montar, probar soníu, les hores d’espera hasta la hora’l conciertu, dalo too nel escenariu y recoyer. Llueu yá si eso, tomamos unes y que pague él, que yo de xuru que voi tardar díes o meses en cobrar el bolu.

Yá qu’escoyisti la to “Banda Sonora Vital”, vamos rematar con una Banda Sonora Orixinal. ¿De qué llibru n’asturianu te prestaría qu’hubiere una película a la qu’amás pongas-y tú la BSO?

Tengo muncha curiosidá por saber qué se siente faciendo una BSO pa una película. Tengo bien de material técnicu pa ello. Confieso que lleo poco. De lo poco que conozo, taba bien musicar “Güeli”. Eses paisanes merecen más qu’una película. Son les que puxaron pa que nosotros temos equí con toles comodidaes del mundu, y viendo les sos vides, a ver si se mos quita tantu refalfiu que tenemos.

Asina fala Dani Álvarez de los cantares qu’escoyó pa la so playlist

1. Nun yes tú – Los Berrones

Porque foi lo primero que sintí d’ún grupu asturianu, cantando n’asturianu y siendo un iconu nacional de la época.

2. Marcha d’Antón el Neñu – Beleño

El primer tema d’ún grupu folk que sintí nuna cinta de cassette. Llexendarios.

3. El solín pel hibierno – Llan de Cubel

Facer esta obra maestra con temes tradicionales tan cenciellos como un cantar d’ánimes, sólo lo pueden facer los nuestros “padres”.

4. Los fayeos de mayo – Felpeyu

Poco hai que dicir d’esti tema. Pa que sepa yo una lletra entera d’ún cantar……

5. De Grau a Concarneau – N’Arba

Cuando siento esti cantar y en xeneral esti discu, viénenseme a la tiesta les nueches folk nel prau Gervasia de Candás. N’Arba ye un grupu infalible pa zarrar una bona sesión de música en direutu nos praos.

6. La viquina – Corquiéu

Dende la marcha del nuestru compañeru “Puru”, ye’l mio himnu y el de muncha xente cercano a él.

7. Esnalar – Llangres

Con esti grupu fixi una xira de branu nel 2005 y como nun lleva gaita, prestábame sintilu descansando detrás del escenariu.

8. Muñeires pa Gordon Duncan – Tejedor

Los discos de los hermanos Tejedor son una de les mios influencies a la hora componer. Música na maleta na mio opinión, ye’l so meyor trabayu no que cinca a la escoyeta de temes, a la producción y les cuerdes d’Ígor Medio, maxistrales.

9. Moxeca – DRD

Un tema perguapu y pegadizu al estilu DRD. Esti discu gústame muncho en xeneral.

10. Arriba limón – Mapi Quintana y Elías García

Una ayalga de discu y un temazu. Poques coses tan alucinantes pudi sintir tocaes en cuatro cuerdes dobles como les coses que dexó feches Elías a lo llargo de la so carrera. Lo d’esti discu trespasa la realidá.

11. Elefantes – La Tarrancha

Esa melodía de trombón paezme bestial. Imaxino al entrañable y almiráu Delfo baillándola y ye capaz de salvame d’ún mal día. Ye un grupu col que me presta abondo collaborar. Adrenalina puro nel escenariu.

12. Los dos couplés – Baxel

Estos dos collacios llegaron esti añu con un trabayu escepcional y con unos cantares perguapos de la tradición musical ribeseyana que taben por descubrir. Esti ye ún d’ellos. Lletra con picaresca, mui musical y pegadizo.

13. Africanos en Madrid – Amistades peligrosas

Préstame’l pop de los 90, con esti grupu fui collaborador cola Bandona d’Asturies que dirixía Hevia y pa enriba esti tema foi l’elexíu pa facer un playback nun d’aquellos festivales de navidá del colexu.

14. El vals del obrero – Ska-P

Nunca fui de pogos, nin sucedáneos, pero la música Ska bien fecho gústame y esti grupu y esti cantar en concretu tuvo la so época. Yera una de les bandes sonores a la vuelta del tuto de Turón naquella Empresa Fernández de dos pisos, con Alipio al volante y cuando non, col refunfuñón de bigote que envede poner música, ponía focicos y reñía a los que facíamos dalguna trastá (rises).

15. Let it be -The Beatles.

Esti ye ún de los temes colos que deprendí a armonizar y a facer igües d’otros instrumentos, coles clases maxistrales d’armonía moderna que mos ponía Tom Prendes na Escuela Música de Mieres. Fago homenaxe con él, al saxofonista y pintor Juan Luis Varela qu’en paz descanse y al restu de compañeros d’aquella clase. Deprendí muncho de toos ellos y foi una época mui prestosa.

16. Ornitology – Charlie Parker

Siempre almiré la música de jazz y la función que tien la improvisación y les escales complexes qu’usen. Esti tema saquelu gracies a un dúu que tuvieron Moi Suárez y Diego Pangua, Folknitology.

17. O’stravaganza – Vivaldi, De Courson & Le Berre; O’stravaganza (after Vivaldi’s Sinfonía, RV 168)

De los primeros discos orixinales foriatos que me regalaren, mecigayando lo clásico col folk.

 18. The Butterfly – The Bothy Band

Esti tema ye l’entamu d’una suite que fixi pa banda gaites só’l repertoriu d’esti grupu pioneru y motivador tamién del mio interés pola Uilleann Pipe.

19. Casu – Lúnasa

Un referente de la música irlandesa tocando un par de temes asturianos y ún gallegu.

20. Eb Reels – Flook.

Gracies a esti grupu, descubrí un mundu de posibilidaes na técnica de la flauta y el bodhran.

Mercar discos folk na tienda online