Semeyes cedíes por Prau Llerón y FelipeSM
Nun se m’ocurre meyor banda sonora pa narrar esta crónica que tener la TPA puesta cola final del II Premiu Obdulia Álvarez «La Busdonga» d’Asturianada de fondu. Voi adulces organizando les idees a la calor de la cocina de carbón en casa de los güelos de la mio amiga Giovana, en Fonduveigas. Degaña ye bon llugar pa escribir esta crónica, afuera ta cayendo una nevada que probablemente mañana nun me dexe llegar a una hora razonable a trabayar, pero enseñaráme una vegada más que vivir n’Asturies ye dexase llevar y adaptase a lo qu’hai. Les manes fríes depués d’una xornada de matanza oblíguenme a dir rápido na narración, les conversaciones na sobremesa con tola familia de la mio amiga llévenme obligatoriamente a tener que cuntar lo que viví’l sábadu, un auténticu exerciciu de memoria y conocencia de lo nueso. Esti fin de selmana la mio misión foi mirar la tradición colos güeyos sollertes y ensin parpadiar.
«Quien tuvimos la suerte de tar el sábadu nel Teodoro Cuesta de Mieres pa ver l’espectáculu Diarios d’Ampudia fuimos a una de les mayores lecciones d’historia del folclor y tradición del país»
Quien tuvimos la suerte de tar el sábadu nel Teodoro Cuesta de Mieres fuimos a una de les mayores lecciones d’historia del folclor y tradición del país. Al traviés de la vida y obra d’Aurelio de Llano y Roza d’Ampudia, fiximos un percorríu pelos bailles y cantares de toa Asturies. La esperiencia sensorial yá entamara namás cruciar la puerta del auditoriu, el golor llevábanos directamente a los años veinte, una misión del so director Luis Ángel Fernández Santos, quién encargó’l perfume espresamente pa la ocasión. Un fonderu detalle que nos diz bastante de tolo que nos diba deparar la escenificación, detallismu y sensibilidá.
La vida d’Ampudia daba pa una actuación, una novela o una superproducción de Netflix, pero enantes de que naide quiera monetizanos lo nueso, convido a que si esta obra d’arte se repite, naide la pierda. Nun hai llugar del mapa asturianu que nun se pueda sentir representáu. Cantares y bailles recopilaos dende Quirós hasta Llanes, pasando per Ibias, ensin escaecese de les brañes vaqueires y el so peculiar folclor. Pel escenariu pasaron panoyes y les sos esfoyaces, fesories, panderetes, una boda y hasta aguilandeiros del occidente. Foi emocionante ver baille tres baille la ilusión de tresmitir el mensaxe d’Ampudia, quien miraba colos güeyos del que valora lo que tien y quier que naide lo escaeza. Asina que’l llabor d’esti home llevada al teatru con mimu y cuidáu por Luis Ángel y tol grupu de Prau Llerón merez contase d’esi xeitu, con mimu y cuidáu.
El telón abría con un escenariu cenciellu pero orixinal, too entamaba cola presentación d’Ampudia y tres d’ello, salía Loreto Suárez sosteniendo a la criatura en brazos y mentanto sonaba una versión de ‘Duerme fíu del alma’, grabada a costa fecha pa poner banda sonora a esti espectáculu. La tenrura de los anicios de la vida d’Ampudia en Caravia fueron dando pasu al ‘Cortexu n’Urbiés’, col son de la Ronda de Turón el protagonista, personificáu pol formidable Carlos Alba, narraba la so etapa estudiantil en Mieres, lo que remató col sueltu y la llixera d’Urbiés. Depués diba llegar una de les primeres espediciones d’Ampudia que nos diba llevar a un pueblu en Cangas de Tinéu, onde Luis Ángel decidió tresportanos col son d’arriba y la xota de Val.lau.
Col cuartu actu llegaron Os Reises del Valledor, al son de la rumba d’Ibias fueron entrando la Basoira, la Cardadora, a Rodalo y el Folecón y fueron faciendo de les suyes ente’l públicu, amenizaos pola gaita, el tambor y la curdión fueron llegando al escenariu y… hasta ehí pueo cuntar, porque si l’espéctaculu se repite, nun me gustaría facer spoiler a quién me llee, yá qu’esta ye la mio segunda parte favorita, porque la primera, como podría adivinar cualquiera que me conoza un poco, foi ensin dulda, la narrativa d’Ampudia n’Aristébanu. El grupu de baille nun pudo representar meyor la rudeza y llocura con que baillaban los vaqueiros.
«Queríu Prau Llerón, gracies por llevame a un viaxe que ye la nuesa toponimia sentimental, gracies por llevanos d’oriente a occidente, por facer alcordanza a los vaqueiros y rematar cola maxa de les nueches de San Xuan»
La dirección de Fernández Santos, los audiovisuales de David AJ -con imáxenes históriques animaes dalgunes d’elles-, les interpretaciones de los músicos y el bon facer d’esta agrupación tradicional pudieron vese al traviés del sueltu y la llixera de Cortés en Quirós o col ramu y referencia de la Borbolla en Llanes, ente xotes, gallegaes y vaqueiraes fueron enseñándonos a toos la nuesa cultura y folclor.
Como diz Lucia Garó, notóse muncho’l trabayu bien fechu, pa tolos que somos detallistes y currantes de lo nueso, esta obra supunxo tamién sentise identificáu y esfrutar viendo que paga la pena trabayar les coses porque siempre habrá quien los valore. Queríu Prau Llerón, gracies por llevame a un viaxe que ye la nuesa toponimia sentimental, gracies por llevanos d’oriente a occidente, por facer alcordanza a los vaqueiros y rematar cola maxa de les nueches de San Xuan.
«Si dalgo nos dexa en posu lo que fixo Prau Llerón foi que la cultura constrúise cola cotidianidá y los momentos de xuntanza, porque eso ye la vida: infancia, amor, cortexu, trabayu en comuña, comedies ente pares, reconocenos frente a la bravura, vaqueira o minera, enternecenos colo que somos»
En pallabres d’Aurelio de Llano y Roza d’Ampudia «Pero no solo de libros y saberes se alimenta el alma de los hombres», nes d’esta cronista que se despide dende unu de los puntos más altos y remotos d’Asturies, y cola llucidez que da tar equí, puedo pronunciame diciendo, que la meyor manera d’ilustrase ye falar colos vieyos, con to güela o col vecín, dexar que te cunten, xuntate con ellos cuando heba que facer llabor, echar un gabitu y tratar d’entender qu’eso ye la vida y esos momentos tamién faen escuela en ti. Facer memoria faenos más llúcidos, valorar y entender el pasáu reconcílianos un pocu cola soledá que nos fai sentir el ritmu de la vida moderna. Si dalgo nos dexa en posu lo que fixo Prau Llerón foi que la cultura constrúise cola cotidianidá y los momentos de xuntanza, porque eso ye la vida: infancia, amor, cortexu, trabayu en comuña, comedies ente pares, reconocenos frente a la bravura, vaqueira o minera, enternecenos colo que somos. Y más nada.
Suscríbite a les nuestres novedaes
