Aporta a Shangái Asturias Sonora, una iniciativa de la estaya de Turismu del Gobiernu del Principáu d’Asturies pa promocionar Asturies per Facebook y YouTube a traviés de la música fecha nel país. El proyectu remóntase a los años 2019 y 2022 -cuando 17 artistes grabaron videoclips financiaos pol Principáu n’entornos icónicos d’Asturies- y agora van poder vese na sede del Instituto Cervantes d’esta ciudá china dientro de l’amuesa ¿De dónde sale ese espacio en mí?.
Les cinco pieces que van amosase hasta’l 17 de febreru son l’«Agarráu de Tresmote» de L-R tocáu en Mual; «Texeora de Bayo» d’Ún de Grao, tocada en Grau; «El Caxón» de Silvia Quesada cantada en La Espina (Salas); la «Danza Pin Pin» de Mapi Quintana y La Maramoniz tocada per Tinéu y Allande; y «Setiembre» d’Eva Tejedor & Les Pandereteres que suena en Grandas de Salime. Amás d’estos artistes, tamién tán publicaos videos d’0tros grupos qu’emplegaron el castellanu nesta ocasión: Rodrigo Cuevas, Marisa Valle Roso, Pauline en la playa, Losone, Staytons, Alfredo González, Mona, Pablo Moro, Elle Belga, Ilegales, Alberto García y Héctor Tuya.
El pasáu 8 de payares el director xeneral d’Acción Cultural y Normalización Lingüística, Antón García, partició na apertura d’esti proyectu espositivu qu’entemez arte y música. D’esta manera, la esposición divídese en dos espacios: una sala principal nel Instituto Cervantes de Shanghái y una estensión na feria d’arte y diseñu West Bund qu’amuesa la obra de seis artistes plásticos asturianos. El proyecto responde a la collaboración del gobiernu asturianu col Instituto Cervantes y, según recueye la web del gobiernu, «busca avanzar na internacionalización de les industries culturales del Principáu».
Suscríbite a les nuestres novedaes
