Esta tarde entama la segunda edición de Música en Rede. Alcuentru profesional, les xornaes dedicaes a la industria musical qu’entama la Conseyería de Cultura, Política Llingüística y Deporte a traviés de Cultura en Rede. Llaboral Ciudá de la Cultura de Xixón va hasta’l xueves 10 d’abril esti eventu pal que yá ta anunciada la programación actualizada formada por showcases (Llabor), alderiques (Conxustes), talleres (Erbíes), alcuentros comerciales (Xuntes) y presentación de proyectos (Rolda). Quien tovía nun s’inscribió pa participar, pue facelo nesti enllaz.
L’actividá arranca güei a les 16h col rexistru de participantes y a les 17h la mesa redonda Ciudaes musicales y turismu musical: un futuru sostenible p’Asturies na que participen Lara M. Martínez (Gobiernu del Principáu d’Asturies), David Arlandis(Visit València), Paula Simó (Universitat de València). A partir de les 18.30h son los showcases de Blues&Decker (18:30 h/Teatru), María Daz (19:15 h/Paraninfu), The Soulers (20:00 h/Teatru) y De Fem (20:40).
El miércoles 9 hai programación dende les 9.45h de la mañana onde Vanessa Gutiérrez, conseyera de Cultura, Política Llingüística y Deporte, va dar la bienvenida institucional. El primer coloquiu del día ye, a les 10h, Celtic Connections & Festival Interceltique de Lorient: dos modelos d’éxitu. Dempués del almuerzu en rede ye la mesa d’alderique Entornos dixitales y música: fórmules de comunicación nueves na que va participar Xicu Ariza de Musicasturiana.com xunto a los comunicadores y creadores de conteníos Arturo Paniagua (Radio 3, Los 40, La 2 de TVE o Movistar Plus) y Mer Gil (Estación Fetén). La xornada continúa colos alcuentros comerciales, la Espicha en Rede y la presentación de proyectos dende les 15.15h, ente les que s’alcuentra una ponencia de SIENTI, la guía de musicasturiana.com.
La tarde del miércoles sigui a les 16.30h col coloquiu Una asociación nueva de mánagers musicales pa España, na que participa Carlos Barral d’El Cohete Internacional xunto otros managers d’otros puntos del Estáu y con Dende Asturies al mundu: 3 exemplos dende lo local, onde Aarón Zapico, Marisa Valle Roso y Fernando Arias alderiquen a les 17.30h del so llabor y repercusión fuera de les nuestres llendes. Pa zarrar la xornada tán los showcases de Akin&The Afrobeat Brothers (18:30 h/Teatru), Marco Martínez Trío (19:15 h/Paraninfu), Vérsica (20:00 h/Teatru) y Llevólu’l Sumiciu (20:45 h/Cocines Vieyes).
El xueves 10 la programación arranca a les 10h col alderique Propuestes metodolóxiques nueves pa la enseñanza musical na qu’intervien el músicu y pedagogu Rodrigo Joglar xunto a otros representantes d’entidaes académiques de fuera d’Asturies. A les 11h Paula Madroño -de la Sección de Planificación y Programación Cultural de la Conseyería de Cultura, Política Llingüística y Deporte- va falar del Financiamientu autonómicu pa la música n’Asturies. Pa les 12.45h Pablo Fernández d’Humo Internacional alderica con Pepo Márquez (Big Audio Media) de Música y autoxestión dende les periferies.
Dempués de la espicha, la tarde del xueves continúa con más presentaciones de proyectos a les 15.15h y coles sesiones formatives Sync y Licensing musical: oportunidaes na industria audiovisual -impartida por Carmen Rodríguez Díaz (Yellow Bricks Music) a les 16.30- y DIY 101: Claves pa empezar cola autoxestión musical d’Ainara LeGardon a les 17.30h. Les actuaciones d’Herbamora (18:30 h/Teatru), Maimuny (19:15 h/ Paraninfu), Alienda (20:00 h/Teatru) y Vero Rubio (20:45 h/Paraninfu) zarren los alcuentros.
Suscríbite a les nuestres novedaes
